तस्करले मारेका दुई गैँडा भेटिए, दुवै खागविहीन

चितवन- चितवन राष्ट्रिय निकुञ्जमा तस्करबाट दुईवटा गैँडा मारिएका छन्। निकुञ्जको पूर्वी सेक्टरअन्तर्गत सतरचुली पोष्टबाट तीन दशमलव पाँच किलोमिटर दक्षिण–पूर्वमा खाल्डोमा पारेर गैँडा मारिएका हुन्।

अन्दाजी ६ वर्ष र १८ वर्षका पोथी गैँडा खाल्डोमा मरेको अवस्थामा भेटिएका निकुञ्जका सूचना अधिकारी गणेश तिवारीले पुष्टि गरे।

दुवै गैँडा खागविहीन अवस्थामा मृत भेटिएका छन्। उनले भने, ‘६ वर्षको गैँडाको खाग काटिएको देखिएको छ। अर्को ठूलो गैँडाको पनि खाग छैन।’

सूचना अधिकारी तिवारीका अनुसार ६ वर्षको गैँडा मृत भेटिएको खाल्डो नयाँ हो भने अर्को गैँडाको खाल्डो तुलनात्मक रूपमा केही पुरानो हो।

सानो गैँडा अन्दाजी तीन दिन पहिले र ठूलो गैँडा १० दिन जति पहिला खाल्डोमा पारिएको अनुमान गरिएको छ।

बिहीबार साँझ मात्र घटनाको विवरण आएलगत्तै अनुसन्धान थालिएको उनले बताए।

यस वर्ष निकुञ्जमा चोरी–सिकारीबाट पहिलोपटक गैँडा मरेका हुन्। प्राकृतिक कारणले ५ वटा गैँडा मरेका छन्। गत वर्ष तस्करले अमलटारी क्षेत्रमा २ वटा गैँडा मारेका थिए।