मुम्बईमा उपचाररत सांसद भण्डारी हिँड्न थाले

काठमाडौँ- स्वास्थ्यमा सुधार आएसँगै कांग्रेस सांसद चन्द्र भण्डारीलाई हिँडाउन थालिएको छ। गत ३ फागुनमा बुद्धनगरस्थित आफ्नै निवासमा खाना पकाउने एलपी ग्यास लिक भई आगलागी हुँदा भण्डारी र उनकी आमा हरिकला घाइते भएका थिए।

भण्डारीलाई कीर्तिपुरस्थित बर्न अस्पतालमा उपचार गरिए पनि जटिल भएपछि थप उपचारका लागि ४ फागुनमा भारतको मुम्बईस्थित नेसनल बर्न सेन्टरमा लगिएको थियो।सांसद भण्डारीको स्वास्थ्यमा क्रमिक रूपमा सुधार आएको उनका सहयोगी योगराज कँडेलले बताए।

‘भण्डारीको अनुहारको छाला राम्रो हुँदै आएको छ। बायाँ हातको पट्टी खोलिइसकिएको छ। कलमी गरिएको छालाले पनि राम्रो काम गरिरहेको चिकित्सकले जानकारी दिएका छन्,’ कँडेलले भने, ‘सांसद भण्डारीलाई दैनिक फिजियोथेरापी गराइन्छ भने तीन–चार पटक हिँडाउन थालिएको छ। अरूको सहयोगमा हिँड्न थाल्नुभएको छ।’

कीर्तिपुर अस्पतालमा उपचारका क्रममा भण्डारीकी आमा हरिकलाको ४ फागुनमा मृत्यु भएको थियो।