रातोपुलको स्पामा प्रहरीको छापा, सञ्चालक पक्राउ

काठमाडौं- काठमाडौंको एक ब्युटी पार्लर एन्ड स्पा सेन्टरमा छापा मारी प्रहरीले सञ्चालकलाई पक्राउ गरेको छ।

मानव बेचबिखनजन्य कसुर गरेको पाइएपछि स्पा सेन्टरमा छापा मारेर नाबालिकासहित तीन जनालाई उद्धार गरिएको प्रहरीले जनाएको छ।

काठमाडौं-९ रातोपुलस्थित ‘नुवाकोट ब्युटी पार्लर एन्ड स्पा सेन्टर’मा आइतबार छापा मारी सञ्चालकलाई प्रहरीले पक्राउ गरिएको मानव बेचबिखन ब्युरो बबरमहलका प्रवक्ता प्रहरी उपरीक्षक कृष्णप्रसाद पंगेनीले बताए।

पक्राउ पर्नेमा संखुवासभा चिचिला गाउँपालिका-१ घर स्थायी भएका स्पा सञ्चालक ४३ वर्षीय दिनेश पौडेल रहेका छन्।

स्पामा काम गर्ने युवतीहरूलाई जबरजस्ती यौनधन्दामा लगाएको सूचनाको आधारमा पुगेको टोलीले पौडेललाई पक्राउ गरेको पंगेनीले बताए।

स्पाबाट नाबालिकासहित तीन जना युवतीहरूलाई उद्धार गरिएको उनले बताए। पंगेनीका अनुसार उद्धार गरिएकामा दुई जना नाबालिका (१८ वर्षमुनि)का रहेका छन्।

उद्धार गरिएका नाबालिकासहित युवतीलाई मनोपरामर्श दिएर आफन्तको जिम्मा लगाउने तयारी भइरहेको उनले बताए।

पौडेलले आर्थिक अवस्था कमजोर भएका, ग्रामीण भेगका कम पढे-लेखेका युवतीहरूलाई आकर्षक तलब सुविधा दिने प्रलोभनमा पारी स्पा सेन्टरमा काम गर्न बोलाउने गरेको खुलेको छ।

पक्राउ परेका पौडेलसहित केही व्यक्तिले एयरपोर्टनजिकै अन्य दुई वटा स्पा सेन्टर खोलेको पाइएको छ। ती स्पामा काम गर्ने युवतीहरूलाई आलोपालो एक ठाउँबाट अर्को ठाउँमा पठाउने गरेको खुलेको पंगेनीले बताए।

‘स्पा सेन्टरमा काम गर्ने युवतीहरूलाई मसाजका साथै शारीरिक सम्पर्क राख्न दबाब दिने गरेको अनुसन्धानबाट खुलेको छ,’ पंगेनीले भने।

अह्राएको काम गर्न नमाने शारीरिक तथा मानसिक यातनासमेत दिने गरेको पाइएको पंगेनीले बताए।

‘पक्राउ परेकाले पुरुषहरूसँग अश्लील क्रियाकलाप गरेको फोटो,भिडिओ आफूसँग सुरक्षित रहेको र भने अनुसार नगरेमा/नमानेमा सामाजिक सञ्जालमार्फत् आफन्तलाई पठाइदिने भनी डर त्रासमा पार्ने गरेको पीडितले बताएका छन्,’ पंगेनीले भने।

युवतीहरूलाई जबरजस्ती यौन व्यवसायमा लगाएर पौडेलले आफूले आर्थिक लाभ लिने गरेका थिए।

पौडेललाई सोमबार मानव बेचबिखन तथा ओसारपसार मुद्दामा जिल्ला अदालतबाट पाँच दिन थुनामा राख्ने अनुमति लिई अनुसन्धान थालिएको पंगेनीले बताए।