५५ इन्टरनेट कम्पनीले बन्द गरेनन् टिकटक, लाइसेन्स खारेज गर्ने नियामकको चेतावनी

काठमाडौँ- टिकटकमाथि प्रतिबन्ध लगाउने कार्यमा सहयोग नगरेको भन्दै नियामक नेपाल दूरसञ्चार प्राधिकरणले ५५ इन्टरनेट सेवा प्रदायक कम्पनीको लाइसेन्स खारेज गर्ने चेतावनी दिएको छ। मंगलबार सूचना जारी गर्दै आफ्नो निर्देशन अटेर गरेको भन्दै २४ घण्टाभित्र स्पष्टीकरण पेस गर्न र चित्तबुझ्दो जवाफ नदिए लाइसेन्स खारेजीको प्रक्रिया अगाडि बढाउने चेतावनी दिएको हो।

सामाजिक सद्‍भाव एवम् सामाजिक वातावरणमा नकारात्मक असर पारेको भन्दै नेपाल सरकार मन्त्रिपरिषद्‌को २७ कात्तिक २०८० को बैठकले टिकटकमाथि प्रतिबन्ध लगाएको थियो। मन्त्रिपरिषद्को निर्णयअनुसार प्राधिकरणले सम्पूर्ण इन्टरनेट सेवा प्रदायक र मोबाइल सेवा प्रदायकलाई निर्देशन दिएको थियो।

२८ कात्तिक र २ मङ्सिरमा दुई पटक निर्देशन जारी गरेको प्राधिकरणको निर्णयलाई केही सेवा प्रदायकले भने अझसम्म पनि अटेर गरेका छन्। ५५ इन्टरनेट सेवा प्रदायकले अटेर गरेको प्राधिकरणको ठहर छ।

‘२४ घण्टाभित्र निर्णय कार्यान्वयन भए नभएको विषयमा जानकारी गराउन यो सूचना प्रकाशन गरिएको छ,’ सूचनामा भनिएको छ, ‘संलग्न सूचीमा उल्लिखित इन्टरनेट सेवा प्रदायक कम्पनीहरूबाट २४ घण्टाभित्र कुनै पनि जवाफ प्राप्त नभएमा….अनुमतिपत्र खारेजीलगायतका कारबाही प्रक्रिया अगाडि बढाइने व्यहोरा समेत यसै सूचना द्वारा जानकारी गराइन्छ।’

७० इन्टरनेट सेवा प्रदायकले भने टिकटकमाथि रोक लगाइसकिएको प्राधिकरणको भनाइ छ।

यी हुन् टिकटक बन्द नगर्ने ५५ इन्टरनेट कम्पनी