नेपालमा बसेर अमेरिकामा अनलाइन क्यासिनो खेलाए, एक वर्षमै दुई करोड ठगे

काठमाडौं -​ अनलाइन क्यासिनो गेम खेलाएर करिब दुई करोड ठगी गरेको आरोपमा एक जना पक्राउ परेका छन्।

पक्राउ पर्नेमा काठमाडौं कागेश्वरी मनोहरा नगरपालिका-७ बस्ने २६ वर्षीय आकाश रेग्मी छन्।

उनलाई काठमाडौं उपत्यका अपराध अनुसन्धान कार्यालयको टोलीले सोमबार काँडाघारीबाट पक्राउ गरेको हो।

कार्यालयका प्रवक्ता प्रहरी उपरीक्षक रवीन्द्र रेग्मीका अनुसार उनले अनलाइन ग्याम्बलिङ तथा अनलाइन क्यासिनो गेमहरूमा बाजी राख्दा जितिन्छ भन्दै खेलाउने गरेको पाइएको छ।

हालसम्म उनले एक करोड ९५ लाख ९५ हजार ११७ रुपैयाँ ठगी गरेको पाइएको रेग्मीले बताए।

उनको साथबाट प्रहरीले म्याक बुक, राउटर, मोबाइल, हार्ड ड्राइभ, २ लाख २४ हजार रुपैयाँ, एयर युनिट तथा अमेरिकी डलर तीन सय बरामद भएको छ।

रेग्मीले म्याक बुक एयरमा होबिबी नामको गुगल सिटमा विभिन्न क्यास एप अकाउन्टहरूको महिनैपिच्छेको हिसाब राखेको देखिएको छ।

विभिन्न जिमेल आइडीहरूमा क्यास एप भेरिभिकेसन, जिमेलको इन्बक्समा म्यासेजहरू देखिएको छ।

उनको मोबाइलमा बेटिङको लोड तथा विथड्र सम्बन्धी च्याटहरू र क्यास एप भेरिफिकेसनको स्क्रिनसर्टहरू देखिएको छ।

रेग्मीले एक वर्षअगाडिदेखि अनलाइन क्यासिनो खेलाएको पाइएको छ। उनले जारी नोभेम्बर महिनासम्म गरेको कारोबारको विवरण प्रहरीले प्राप्त गरेको छ।

उनले अमेरिकामा बस्ने विदेशीहरूलाई क्यासिनो खेलाउने गरेका थिए। क्यासएपमा ब्यालेन्स लोड गर्न मिल्ने भएकाले उनले त्यहाँबाट रकम पाउँथे।

कार्यालयका प्रमुख प्रहरी वरिष्ठ उपरीक्षक सोमेन्द्रसिंह राठौरका अनुसार एक पटकमा उक्त एप्सबाट पाँँच सय डलरको कारोबार नभई निकाल्न मिल्दैन।

‘जब पाँच सय डलरको कारोबार हुन्छ, उनले त्यसबापत् २० प्रतिशत रकम कमिशन पाउँथे,’ राठौरले भने, ‘गेम खेल्ने पनि विदेशी नै, क्यासएप पनि अमेरिकाकै कम्पनी हो।’

तर, उनले कमिशनबापतको रकम हुण्डीमार्फत् बुझ्थे। राष्ट्र बैंक ऐन अनुसार हुण्डी कारोबार गैरकानुनी हो। रकम प्राप्त गरेबापत् राजश्व प्राप्त नहुने भएकाले यसलाई गैरकानुनी मानिएको हो।

उनी क्यासिनो खेलाउने मुख्य एजेन्ट हुन्। रेग्मीले कार्यालय खोलेरै अनलाइन क्यासिनो खेलाएको पाइएको छ।

उनले एक जना म्यानेजर र केही कर्मचारी राखेका छन्। प्रहरीले म्यानेजर र कर्मचारीलाई खोजिरहेको हुनाले कार्यालयको ठेगाना गोप्य राखेको छ।

रेग्मीले चार वटा बैंक खाता खोलेको प्रहरीले पत्ता लगाएको छ। रेग्मीमाथि थप अनुसन्धानका लागि जिल्ला प्रहरी परिसर काठमाडौं पठाइएको छ।