संसद् सचिवालयका उपसचिवद्वारा अधिकृतमाथि हातपात

काठमाडौँ- संघीय संसद सचिवालयका उपसचिव रामप्रसाद गैरेले शाखा अधिकृत सिर्जना तण्डुकारमाथि हातपात गरेका छन्।

उपसचिव गैरेले मंगलबार बिहान अधिकृत तण्डुकारमाथि हातपात गरेका हुन्। प्रतिवेदनमा आफ्नो नाम नराखेको भन्दै अधिकृतमाथि हातपात गरेको बताइएको छ। उपसचिव गैरेले ‘मैले गरेको काम बिगार्ने तैं होइनस्?’ भन्दै अधिकृत तण्डुकारमाथि झापड हानेका थिए।

घटनापछि अधिकृत तण्डुकारको स्वास्थ्य परीक्षण गरिएको थियो। मेडिकल रिपोर्टमा उनीमाथि हातपात भएको देखिएको उल्लेख छ।

आफूमाथि हातपात भएको भन्दै अधिकृत तण्डुकारले उपसभामुख इन्दिरा रानालाई जानकारी गराएकी थिइन्। उपसभामुख इन्दिरा राना मगरले यो विषयमा आफूलाई अधिकृत तण्डुकारले जानकारी गराएको बताइन्। यसपछि भने यो विषयमा संसद सचिवालयले छानबिन गर्ने उनको भनाइ छ।

‘उहाँ (गैरै)ले ढोकाबाट प्रवेश गरेर एक्कासी झापड हान्नु भएको भनिएको छ,’ उनले भनिन्, ‘यो विषयमा संसद सचिवालयमा निवेदन पुगिसकेको छ। अब सचिवालयले छानिबिनको प्रक्रिया अघि बढाउँछ।’

यद्यपि कुन विषयमा विवाद भएको र कसको कस्तो कमजोरी भएको भन्नेबारेमा आफू प्रष्ट भइनसकेको उनको भनाइ छ।

गैरे र तण्डुकार दुवैले संसद सचिवालयमा निवेदन दिएको संसद सचिवालयका सचिव डा रोजनाथ पाण्डले बताए। ‘उहाँहरू दुवै जनाको निवेदन आएको छ। अब निवेदनमाथि हामीले छानबिन गर्छौँ। दुवै जनाको बयान लिन्छौँ,’ डा पाण्डेले भने, ‘त्यसपछि कसलाई कस्तो कारबाही गर्ने भन्ने टुंगो लाग्छ।’