कोशीबाट ३० पहिचानवादी पक्राउ, एमालेयात्रा नसकिएसम्म हिरासतमै

विराटनगर- नेकपा एमालेको मध्य पहाडी राजमार्ग सङ्कल्प यात्रालाई अवरोध गर्न खोजेको आरोपमा कोशी प्रदेशबाट अहिलेसम्म ३० जना पहिचानवादी पक्राउ परेका छन्।

कोशी प्रदेश प्रहरी कार्यालयका अनुसार उदयपुर, खोटाङ, भोजपुर र धनकुटामा गरी ३० जनालाई पक्राउ गरिएको हो।

बिहीबार भोजपुरबाट ९ जनालाई पक्राउ गरिएको छ। पक्राउ पर्नेमा जनता समाजवादी पार्टी भोजपुरका जिल्ला उपाध्यक्ष मन्जु राई, जिल्ला सदस्य दिनेश राई, धिरज राई, मणि राई, विद्यार्थी नेता धिरेन खिम्बू, तयाबङु राई र विकास राईलगायत छन् ।

यसअघि मङ्सिर २६ गते प्रहरीले उदयपुर र खोटाङबाट पूर्वमन्त्री तथा नेता गोपाल किराँतीसहित १२ जनालाई पक्राउ गरेको थियो। पक्राउ पर्नेहरूमा मिना राई, दिनेश राई, पनन राई, विदुर राईलगायत छन्।

बुधबार धनकुटाबाट पक्राउ पर्नेहरूमा प्रदेश पहिचान संयुक्त सङ्घर्ष समिति सङ्खुवासभाका संयोजक वीरेन्द्र खारा राई, किरात राई यायोख्खाका धनकुटा अध्यक्ष उद्धवमणि राई, किरात याक्थुङ चुम्लुङ धनकुटा अध्यक्ष कमलसि तिगेला, नेताहरू उमा चाम्लिङ, जितेन्द्र्र माम्पाङ, करवील कुलुङ, जुद्ध राई, शोकुल राई र पनित कुलुङ रहेका छन्। उनीहरूलाई धनकुटा र भोजपुरको सीमामा पर्ने लेगुवाबाट पक्राउ गरिएको हो।

एमालेको अभियान आज लेगुवाबाट धनकुटा प्रवेश गर्दैछ। टोलीले पाख्रिबास, हिले, सिधुवा हुँदै तेह्रथुमको वसन्तपुरमा सभा गर्ने तयारी गरेको छ। उक्त यात्रालाई प्रभावित पार्न सक्ने भन्दै ती क्षेत्रमा सुरक्षा सतर्कता मजबुत बनाइएको प्रदेश प्रहरी कार्यालय कोशीले जानकारी दिएको छ।

यसअघि प्रहरीले झापाको दमकमा मुख्यमन्त्री केदार कार्कीलाई कालो झण्डा देखाउँदै उनको गाडीमा ढुङ्गा प्रहार गर्ने १ जनालाई पक्राउ गरेको छ। पक्राउ पर्नेमा पाण्डव चौधरी रहेका छन्। कालो झण्डा देखाउने अन्यको पनि खोजी भइरहेको डिआइजी बाँस्तोलाले बताए।

एमालेको अभियान नसकिएसम्म पक्राउ परेका पहिचानवादी नछोडिने प्रहरीले जनाएको छ। एमालेको अभियान पुस २ गते पाँचथरको चिवाभञ्ज्याङमा पुगेर सकिँदैछ।