महासमितिमा पेस गर्ने प्रतिवेदन संयुक्त बनाउन छलफलमा गगन-विश्व

काठमाडौँ- नेपाली कांग्रेसका महामन्त्रीद्वय गगनकुमार थापा र विश्वप्रकाश शर्माले पार्टीको महासमिति बैठकमा आफ्नो भागमा परेका प्रतिवेदनलाई संयुक्त रूपमा प्रस्तुत गर्ने भएका छन्। यो विषयमा दुई महामन्त्रीबीच नक्सालमा छलफल चलिरहेको महामन्त्री गगन थापा निकट एक नेताले जानकारी दिए।

आगामी महासमिति बैठकमा महामन्त्री थापालाई सांगठनिक प्रस्ताव पेस गर्ने जिम्मेवारी छ भने अर्का महामन्त्री शर्माले समसामयिक राजनीतिक प्रस्ताव तयार गर्ने जिम्मेवारी छ। यी दुवै प्रतिवेदनलाई संयुक्त रूपमा प्रस्तुत गर्न दुवै महामन्त्रीबीच छलफल भइरहेको ती नेताको भनाइ छ।

महासमिति बैठकमा उपसभापति पूर्णबहादुर खड्कालाई पार्टीको आगामी नीतिका विषयमा प्रतिवेदन बनाउने जिम्मेवारी छ। सभापति शेरबहादुर देउवाले महासमिति बैठक र राष्ट्रिय सभा सदस्य निर्वाचनबारे छलफल गर्न शुक्रबारका लागि केन्द्रीय कार्यसम्पादन समितिको बैठक बोलाएका छन्।

कांग्रेसले आगामी पुस १६ देखि १९ गतेसम्म ललितपुरको गोदावरीमा महासमिति बैठक गर्ने निर्णय गरेको छ। बैठकमा देशभरिबाट करिब २५ सय जना महासमिति सदस्य सहभागी हुने अपेक्षा गरिएको छ। कांग्रेसले यसअघि १४ महाधिवेशनका बेला नीतिसम्बन्धी विषयलाई थाती राख्दै नेतृत्व मात्र चयन गरेको थियो। त्यसबेला नीति महाधिवेशन छुट्टै गर्ने बताएको कांग्रेसले पछि विधानमा नीति महाधिवेशनसम्बन्धी छुट्टै व्यवस्था नभएको भन्दै महासमिति बैठक बोलाएर त्यसैबाट नीतिसम्बन्धी दस्तावेज पारित गर्ने निर्णय गरेको थियो।

महामन्त्रीद्वयसहित कोइराला समूहका नेताले तोकिएको मितिमै महासमिति बैठक गर्न दबाब दिइरहेका छन्। तर सभापति देउवाले भने जाडोयाममा बैठक गर्न नसकिने बताउन थालेका छन्। शुक्रबारको बैठकले यससम्बन्धी निर्णय लिनेछ।