कांग्रेसको ठहर : परराष्ट्रमन्त्री युद्धग्रस्त देश पुगेर नेपालीको उद्धार गर्दा देशको साख बढ्यो

काठमाडौँ- सत्तारुढ नेपाली कांग्रेसले युद्धग्रस्त मुलुक इजरायलबाट अप्ठेरोमा परेका नेपालीहरूलाई उद्धार गर्ने परराष्ट्रमन्त्री एनपी साउद नै पुगेको कार्यको प्रशंशा गरेको छ। यस्तो साहसिक कार्यले अन्तर्राष्ट्रिय जगतमा नेपालको साख वृद्धि भएको कांग्रेसको ठहर छ।

पुस १२ देखि १४ गतेसम्म बसेको केन्द्रीय कार्यसमिति बैठकले यसका लागि सरकार र परराष्ट्रमन्त्री एनपी साउदलाई धन्यवाद ज्ञापनसमेत गरेको छ।

‘हमास इजरायल युद्धमा हमासको आक्रमणमा परि ज्यान गुमाएका नेपाली नागरिकको शव स्वदेश ल्याउने तथा विपतमा परेका सयौं नेपाली विद्यार्थीहरूको उद्धारका लागि नेपालका परराष्ट्र मन्त्री नेपाली ध्वजावाहक विमान लिएर आफैं युद्धग्रस्त मुलुकको भूमिमा पुगेर सफताका साथ उद्धार गर्ने साहसिक कार्यले नेपाली जनतामा गौरव महसूस गराएको छ,’ बैठकका निर्णयहरु सार्वजनिक गर्न आइतबार पार्टी कार्यालयमा आयोजित पत्रकार सम्मेलनपछि जारी प्रेस विज्ञप्तिमा भनिएको छ, ‘अन्तर्राष्ट्रिय जगतमा नेपालको साख वृद्धि भएको छ।’

कांग्रेसले पार्टीका तर्फबाट साउदले परराष्ट्र मन्त्रालयको जिम्मेवारी सम्हालेपछि नेपालको परराष्ट्र सम्बन्धमा उल्लेख्य प्रगति भएको पनि उल्लेख गरेको छ।

संयुक्त राष्ट्र संघका महासचिवको नेपाल भ्रमण सम्पन्न हुनु र नेपाली कामदार भएका मुलुकमा नेपाली राजदूतावास खोल्ने कार्य प्रशंसनीय भएको कांग्रेसको ठहर छ।

कांग्रेसले इजरायलमा अध्ययनरत नेपाली विद्यार्थी विपिन जोशीको यथाशीघ्र रिहाई गर्न र रूस–युक्रेन युद्धमा रूसी सेनामा भर्ना भइ युद्धकै क्रममा निधन भएका नेपाली नागरिकको शव खोजी गरी स्वदेश ल्याउने विषयमा थप कुटनैतिक पहल गर्न सरकारलाई सुझाव दिएको छ।

हालका परराष्ट्रमन्त्री साउद कांग्रेसका केन्द्रीय सदस्य हुन्।