तरलता सुविधाको दुरुपयोग, बढी प्रतिफल आउने क्षेत्रमा लगानी

काठमाडौं- महालेखा परीक्षकको ६०औँ प्रतिवेदनले बैंक तथा वित्तीय संस्थाले स्थायी तरलता सुविधा(एसएलएफ) को दुरुपयोग गरेको ठहर गरेको छ।

बैंक तथा वित्तीय संस्थामा तरलता जोखिम व्यवस्थापन र सो सम्बन्धी आवश्यक व्यवस्था गर्न नेपाल राष्ट्र बैंकले जारी गरेको जोखिम व्यवस्थापन सम्बन्धी निर्देशिकाको चरम दुरुपयोग भएको उल्लेख गरेको हो।

आर्थिक वर्ष २०७६/७७ मा ८३ पटकमा १ खर्ब ३ अर्ब, २०७७/७८ मा १६७ पटकमा ३ खर्ब ६१ अर्ब र आर्थिक वर्ष २०७८/७९ मा ४ हजार ९०८ पटकमा ९१ खर्ब ७० अर्ब स्थायी तरलता सुविधा प्रयोग गरेका थिए।

बैंक तथा वित्तीय संस्थाले तत्काल तरलता समस्या समाधान गर्न उक्त सुविधा उपयोग गरेको बताएपनि त्यसमाथि महालेखाले आशंका व्यक्त गरेको छ। उक्त सुविधा लिएर बैंक तथा वित्तीय संस्थाको ऋण तथा लगानी बढेको प्रतिवेदनमा उल्लेख गरिएको छ।

तरलता सुविधाबाट रकम लिएर बढी प्रतिफल प्राप्त हुने क्षेत्रमा लगानी गरेको देखिएको र एसएलएफ सुविधा तरलता समस्या समाधानमा मात्रै प्रयोग भएको यकिन हुन अवस्था नदेखिएको महालेखाले भनेको छ।