२१औँ वर्षमा नेपाल टेलिकम, सेवा सुधार गर्न मन्त्री शर्माको निर्देशन

काठमाडौँ- नेपाल टेलिकम २१औँ वर्षमा प्रवेश गरेको छ। सोमबार टेलिकमले २०औँ वार्षिकोत्सव समारोह आयोजना गरी वर्षवृद्धिको उत्सव मनाएको हो।

कार्यक्रममा सहभागी हुन पुगेकी तालुकदार मन्त्री रेखा शर्मा भने टेलिकमको सेवाप्रति असन्तुष्ट देखिएकी छन्। कार्यक्रममा सम्बोधन गर्दै उनले टेलिकमका सेवाप्रति असन्तुष्टि व्यक्त गरेकी हुन्।  मन्त्री शर्माले नेपाल टेलिकमको सेवाको गुणस्तरमा सुधार ल्याउन निर्देशनसमेत दिएकी छन्।

‘हामीले अघि सारेका सेवा प्रवाहमा सुधार र आय वृद्विका कार्य योजनाहरुको प्रगतिको पनि स्मरण र मूल्यांकन गर्ने बेला हो,’ मन्त्री शर्माले भनिन्, ‘हासिल हुन नसकेको बाँकी उपलब्धिको कारण पहिल्याई कमीकमजोरीमा सुधार गरी थप कार्ययोजना र उर्जाका साथ एकताबद्ध भएर अगाडि बढ्न आवश्यक छ।’

टेलिकमले सञ्‍चालनमा ल्याएको ‘नमस्ते-पे मोबाइल वालेटको व्‍यापारमा थप गृहकार्य गर्न उनको निर्देशन थियो।

सरकारको डिजिटल नेपालको अवधारणा कार्यान्वयन गर्न अप्टिकल फाइबर विस्तार गरी सूचना महामार्ग निर्माण गर्ने, मुलुकका सबै क्षेत्रमा दूरसञ्चार सेवाको पहुँच र गुणस्तर वृद्धि गर्नेतर्फ कम्पनीका कार्यक्रमहरु लक्षित हुनुपर्ने उनको भनाइ थियो।

लाइसेन्स खारेज भएका कम्पनीका सम्पत्ति व्यवस्थापन गर्ने कानून संशोधनदेखि, एनसेलको शेयर बिक्री खरिद प्रकरणमा छानबिन गरी प्रतिवेदन लिनेलगायतका काम सरकारले गरिसकेको उनको भनाइ थियो।

‘यो वर्षमात्रै हामीले नयाँ फ्रिक्वेन्सी नीति, २०८० जारी गरेर नेपालको विकासमा अत्यावश्यकीय र राष्ट्रलाई महत्वपूर्ण योगदान दिने दूरसञ्चार क्षेत्रलाई थप व्यवस्थित गर्नेगरी कार्यान्वयनमा ल्याएका छौँ,’ मन्त्री शर्माले थपिन्, ‘अब जतिसक्दो चाँडो हामी डिजिटलाइजेसनमा जानुपर्छ। यसका लागि डिजिटल पूर्वाधार अनिवार्य शर्त हो। दूरसञ्चार क्षेत्रको विकासले मात्र डिजिटलाइजेसनमा योगदान दिने भएकाले पनि यसलाई बढी प्राथमिकता दिनुपर्ने अवस्था छ।’