विमानस्थल कुटपिट घटना : छानबिन समितिलाई डीआईजी चन्दले दिए काउन्टर

काठमाडौँ– त्रिभुवन अन्तर्राष्ट्रिय विमानस्थलमा अध्यागमन अधिकृतमाथि भएको कुटपिटको घटनामा संलग्न भएका भनिएका २ जना प्रहरी पुरस्कृत भएका छन्।

घटनाको छानबिन समितिलाई चुनौती दिँदै विमानस्थल कार्यालयका प्रमुख प्रहरी नायव महानिरीक्षक (डीआईजी) अर्जुन चन्दले उनीहरालई पुरस्कृत गरेका हुन्।

छानबिन समितिले दोषी ठहर गरी कारबाही सिफारिस गरेका दुई जनालाई चन्दले पुरस्कृत गरेका हुन्। उनीहरूलाई पुरस्कारको विवरण अभिलेखमा जनिने गरी राष्ट्रिय प्रहरी किताब खानामा समेत पठाइएको छ।

गृह मन्त्रालयका सहसचिव थानेश्वर गौतम नेतृत्वको समितिले कारबाही सिफारिस गरेका दुई जनासहित तीन जनालाई डीआईजी चन्दले पुरस्कृत गरेका हुन्।

चन्दबाट पुरस्कृत हुनेमा सई प्रकाश चौधरी, सहायक निरीक्षक (असई) सञ्जय तामाङ र जवान रविजंग गुप्ता छन्। चौधरीलाई १ हजार २००, तामाङलाई १ हजार १०० र गुप्तालाई ८०० रुपैयाँसहित चन्दले पुरस्कार रकम प्रदान गरेका हुन्।

गौतम नेतृत्वको समितिले डीएसपीसहित ४ प्रहरीलाई कारबाहीका लागि सिफारस गरेको थियो। यसरी कारबाही सिफारिस हुनेमा तामाङ र गुप्ता पनि थिए। यस्तै डीएसपी रेवतीरमण पोखरेल र प्रहरी जवान राजकुमार महतो पनि कारबाही सिफारिसमा परेका थिए। उनीहरुले आफ्नो ड्युटी कुशलतापूर्वक गरेको र प्रहरी जिम्मेवारी निभाएको भन्दै डीआईजी चन्दले पुरस्कार गरेका हुन्।

छानबिन सिमितले अध्यागमन अधिकृत छायालाल मोक्तानमाथि कुटपिटमा उत्रिएको भन्दै असई सञ्जय तामाङलाई निलम्बनका लागि सिफारिस गरेको थियो। गुप्ता र महतोलाई विभागीय कारबाहीका लागि सिफारिस गरिएको थियो।

त्यसैगरी अध्यागमन अधिकृत छायालाल मोक्तानलाई समेत कारबाही गर्नका लागि सिफारिस गरिएको थियो।

विमानस्थलको घटनामा छानबिन समितिले प्रतिवेदन बुझाएपछि विमानस्थल प्रहरी प्रमुख डीआईजी चन्दले राजीनामा दिएका थिए। तर प्रहरी प्रधान कार्यालयले उनको राजीनामा रीत नपुगेको भन्दै फिर्ता गरेको थियो।