मदरसामा डोजर चलाएपछि भारतको हल्द्वानीमा हिंसा भड्कियो, ५ जनाको मृत्यु

हल्द्वानी– उत्तराखण्डको हल्द्वानीमा प्रहरीले चलाएको गोली लागेर कम्तीमा ५ जनाको मृत्यु भएको छ। घटनामा कम्तीमा ६० जना घाइते भएका भारतीय सञ्चारमाध्यम द वायरले उल्लेख गरेको छ।

डोजर लगाएर मदरसा भत्काएपछि त्यहाँ हिंसा भड्किएको थियो। बिहीबार दिउँसो करिब ३:३० बजे ‘‘मलिक के बगिचे’का मदरसा’ भत्काउन बुलडोजर चलाइएको थियो।

तर स्थानीयहरुले आफूहरूको पवित्र पूजास्थल भत्काउन नदिने बताएका थिए। उनीहरुले मदरसा भत्काउन न त कुनै कानुन/आदेश नदेखाएको र न त अधिकारीहरू उनीहरूको कुरा सुन्न तयार भएको भन्दै आक्रोश व्यक्त गरेका छन्।

‘हाम्रा महिलाहरूलाई पुरुष प्रहरीले लाठीले कुटे। कम्तीमा चार जना पुरुषहरू गोली लागेर गम्भीर घाइते भए,’ एक प्रत्यक्षदर्शीलाई उद्धृत गर्दै द वायरले लेखेको छ। ती प्रत्यक्षदर्शीका अनुसार दोहोरो भिडन्तमा केही प्रहरी पनि घाइते भएका छन्।

नगरपालिकाले मदरसा भत्काउनुअघि दुई जनालाई मदरसाबाट धार्मिक पुस्तक निकाल्न अनुमति दिएको थियो। तर यो समय निकै छोटो थियो।

स्थानीयले कानुन/आदेश देखाउन माग गरिरहेका थिए। तर नगरका अधिकारीहरूलाई भत्काउने आदेश देखाउन तयार भएनन्। अन्ततः बल प्रयोग गरेर अगाडि बढे, जसले स्थितिलाई अशान्त बनाएको थियो।

यो मदरसा रेलवे कालोनी क्षेत्रमा अवस्थित छ। उक्त क्षेत्रमा ४ हजार भन्दा बढी परिवार बस्छन्। रेलवे विस्तारका लागि यो मदरसा भत्काइएको हो। यद्यपि यो मुद्दा सर्वोच्च अदालतमा विचाराधीन छ।

हिंसा भड्किएपछि ‘डीएम (जिल्ला मजिस्ट्रेट) नैनितालले उक्त क्षेत्रमा कर्फ्यू लगाएको छ। कर्फ्युको उल्लंघन गरे गोली हान्न आदेश दिइएको छ,’ समाचार एजेन्सी एएनआईले रिपोर्ट गरेको छ।

गएराति पनि प्रहरीले गोली चलाएको स्थानीयको भनाइ छ। ‘जब हामी घरभित्र थियौं, पुलिसले हाम्रो ढोकामा पनि गोली हानेको थियो। हामी डरमा बाँचिरहेका छौं, यो रोकिनुपर्छ,’ एक स्थानीयको भनाइ छ।

यो विषयमा प्रतिक्रिया दिन भने प्रहरीले अस्वीकार गरेको छ। हल्द्वानी नेपालको पश्चिमी सीमा महेन्द्रनगरबाट करिब १ सय किलोमिटर पश्चिममा पर्छ।