बालुवाटारमा गोली चल्दा वर्षमान पुनकी आमा घाइते

काठमाडौँ- काठमाडौंको बालुवाटारमा गोली चलेको छ। शुक्रबार साँझ माओवादी केन्द्रका नेता वर्षमान पुनका दाजुको घरमा गोली चलेको हो। भीआईपी व्यक्तिको सुरक्षामा खटिएका प्रहरीले गोली चलाएको प्रहरीले बताएको छ।

ती व्यक्तिले चलाएको गोलीबाट वर्षमान पुनकी आमा घाइते भएकी छन्। शुक्रबार राति साढे ९ बजे नेता पुनको दाइको घरमा गोली चल्दा ७४ वर्षीया आमा तीर्थमाली पुन घाइते भएकी हुन्। घाइते तीर्थमालीको ट्रमा सेन्टरमा उपचार भइरहेको छ। उनको खुट्टामा गोली लागेको छ।

गोली चलाउने व्यक्ति शुक्रबार राती नै प्रहरीको नियन्त्रणमा आइसकेका छन्। उनीमाथि अनुसन्धान सुरु भएको प्रहरीले जानकारी दिएको छ। माओवादी नेता पुन उपचारका लागि चीनमा छन्।

भीआईपीको सुरक्षामा खटिने व्यक्तिले साथमै हतियार राख्न पाउने व्यवस्था छ। त्यही अनुसार ती प्रहरी भीआईपीको सुरक्षा सकेर साँझमा घर फर्कन लागेका थिए। शुक्रबार नयाँ वर्ष पनि परेकाले आफन्त पर्ने वर्षमान पुनका दाजुका घरमा पुगेका थिए। त्यही उपस्थितसँगै उनले पनि मदिरा पिएका थिए। मदिरा पिउने क्रममा विवाद हुँदा ती व्यक्तिले पनि आफूसँग भएको पेस्तोल निकाली गोली चलाएको प्रहरीले बताएको छ।