त्रिविमा बढ्ता असफलसिद्ध व्यक्ति उपकुलपति बन्दैछन् : ओली

काठमाडौँ- नेकपा एमालेका अध्यक्ष केपी शर्मा ओलीले सबैभन्दा बढी असफलसिद्ध भइसकेको व्यक्ति त्रिभुवन विश्वविद्यालयको उपकुलपति नियुक्त हुन सक्ने बताएका छन्।

सोमबार काठमाडौँमा आयोजित एक कार्यक्रममा उनले प्रधानमन्त्रीले उपकुलपतिमा भागबन्डा पनि नभई एकलौटी गरेको पनि आरोप लगाए।

‘एउटा समिति बनाउने छानबिन गर्ने, यताउति गर्ने असफल सिद्ध भइसकेका मानिसहरुको छनोट गर्ने,’ ओलीले थपे, ‘अहिले ३ जना सिफारिस भएको छ। तीन जनामा पनि तेस्रो चाहिँ नियुक्त होलाजस्तो लाग्छ छाँटकाँट हेर्दा। किनभने अलि बढ्तै असफल मान्छे चाहियो नि। त्यसो भएर तृतीय नम्बरको नियुक्त हुनुहोला कि जस्तो लाग्छ।’

त्रिभुवन विश्वविद्यालयको उपकुलपति छनोटका लागि प्रधानमन्त्री पुष्पकमल दाहाल प्रचण्डले शिक्षामन्त्री अशोक राईको नेतृत्वमा सिफारिस समिति बनाएका थिए। प्राडा चित्रबहादुर बुढाथोकी, प्राडा केशरजंग बराल र प्राडा टंकनाथ धमलालाई उपकुलपति बनाउन समितिले प्रधानमन्त्रीलाई सिफारिस गरेको छ।