सरकारको निरंकुशता : फुटपाथमा हिँड्न पनि प्रतिबन्ध! [फोटो फिचर]

काठमाडौँ- सरकारले फुटपाथमा समेत प्रतिबन्ध लगाएको छ। सरकारले सिंहदरबार र संघीय संसद भवन नयाँ बानेश्वर अगाडिको फुटपाथमा हिँड्न निषेधित गरेको हो।

फुटपाथमा तारबार र डोरी लगाएर प्रहरीको निषेधित क्षेत्र लेखेको बोर्ड टाँगेको छ। सवारी साधनको ओहोरदोहोर भइरहने क्षेतमा सर्वसाधारणलाई पनि हिँडन पनि प्रतिबन्ध गरेर सरकारले निरंकुशता देखाएको हो।

फुटपाथमा हिँड्न प्रतिबन्ध गरेपछि पैदलयात्रीमाथि सुरक्षा जोखिम परेको छ।

सोमबार लघुवित्त पिडित आन्दोलनकारी नयाँ बानेश्वरस्थित संघीय संसद् भवन प्रवेश गरेर नाराबाजी गरेका थिए। निषेधित क्षेत्रमा संवेदनशील परिसरभित्र प्रदर्शनकारीहरु प्रवेश गरेपछि आज भने संसद भवन र सिंहदरवार वरिपरि सरकारको निरंकुशता फुटपाथमा डोरी लिएर उभिएको हो।

सिंहदरबार र बानेश्वरका फुटपाथमा प्रहरी उभ्याएर कसैलाई पनि फुटपाथमा हिँड्न दिएको छैन।

काठमाडौंका सहायक प्रमुख जिल्ला अधिकारी हरिप्रसाद शर्माले सुरक्षा संवेदनशीलतालाई हेरेर तत्कालीन व्यवस्थापन गरिएको प्रतिक्रिया दिए।

सोमबार लघुवित्तका ऋणीहरुको झण्डै ५० जनाको समूह संघीय संसद भवनमा प्रवेश गरेपछि गृह मन्त्रालयले भवनको बाहिरी सुरक्षामा खटिने प्रहरी निरीक्षकसहित ३२ जनाको जिम्मेवारी खोसेको थियो।

घटनाको छानबिनका लागि प्रहरीले उपत्यका प्रहरी कार्यालयका एसएसपी दिनेशराज मैनालीको नेतृत्वमा छानबिन समिति नै गठन गरेको छ।

उक्त विषयमा सोमबार साँझ उपप्रधानमन्त्री तथा गृहमन्त्री नारायणकाजी श्रेष्ठले सुरक्षा निकायका प्रमुखहरुलाई बोलाएर आक्रोश व्यक्त गरेका थिए।

तस्बिरहरु- नेपाल फोटो लाईब्रेरी