नेपाललाई मलेसियाले दियो २३६ रनको लक्ष्य

काठमाडौं- त्रिवि क्रिकेट मैदानमा जारी एसीसी प्रिमियर कपको उद्घाटन खेलमा नेपालले २३६ रनको लक्ष्य पाएको छ। विपक्षी मलेसियाले निर्धारित ५० ओभर खेल्दै ९ विकेट गुमाएर २३५ रन बनाएपछि नेपालले २३६ रनको लक्ष्य पाएको हो।

खेलमा नेपालले छैटौं ओभरको पाँचौ बलमा पहिलो विकेट लिएको थियो भने दोस्रो विकेटका लागि ३४औं ओभरको दोस्रो बल पर्खिनु परेको थियो। गुल्सन झाले ओपनर मुहम्मद अमिरलाई छैटौं ओभरमा आउट गराएका थिए।

राम्रो प्रदर्शन गरेको मलेसियाको पहिलो विकेट झर्दा उसले २२ रन बनाएको थियो। त्यसपछि मैदानमा रहेका वीरनदिन सिंहले कप्तान अहमद फाइजसँग मिलेर ११६ रनको साझेदारी गरे।

दोस्रो विकेटमा रुपमा आउट हुनुअघि फाइजले ९५ बलमा ७६ रन बनाएका थिए। सन्दीप लामिछानेको बलमा आसिफ शेखले फाइजलाई स्टम्पिङ गराएका हुन्। त्यतिबेलासम्म सिंहले पनि ४१ रन बनाइसकेका थिए।

नेपालले पहिलो विकेट गिराएको लामो समयसम्म दोस्रो विकेट लिन सकेन। छैटौं ओभरमा विकेट लिएपछि नेपालले अर्को विकेटको लागि २८ ओभर लामो यात्रा गर्नु परेको थियो। नेपालका लागि बलिङ गरिरहेका सोमपाल कामी, ललित राजवंशी, आरिफ शेख, कुशल मल्ल र दिपेन्द्र सिंह ऐरीले ३७ ओभर सकिँदासम्म पनि विकेट लिएन सकेका थिएनन्।

यसबीच नेपालले दुई मात्र विकेट लिन सकेको थियो। मलेसियाविरुद्ध नेपालले गरेको यो निकै फितलो र कमजोर प्रदर्शनसमेत हो। तर ३८औं ओभरको पहिलो बलमा ललितले व्यक्तिगत पहिलो विकेट लिए।

उनको बलमा अर्धशतक पुर्‍याउन लागेका विरनदीप सिंह आउट भए। मैदानमा ९४ बल खेलेर ४६ रन बनाएको अवस्थामा ललितले विरनदीपलाई सोमपालबाट क्याचआउट गराएका थिए। यसरी मलेसियाले तेस्रो विकेट गुमाउँदा १५५ रन बनाइसकेको थियो।

ललितले अर्को विकेट भने ४०औं ओभरको पहिलो बलमा लिए। उनले त्यतिबेला विजय उन्नीलाई पेबेलियन फर्काएका थिए। सोमपालले खेलको ४१ औं ओभरको चौथो बलमा सियल अजिजलाई रोहित पौडेलको हातबाट क्याचआउट गराए। आउट हुनुअघि अजिजले १३ रन बनाएका थिए।

यससँगै मलेसिया पाँच विकेट गिराएर १७३ रन बनाएको अवस्थामा थियो। नेपालले पछिल्लो चार ओभरमा तीन विकेट लिएको अवस्था भयो। त्यो अवस्थामा प्रशिक्षक मोन्टी देशाई आफैं पानी बोकेर मैदानको वरिपरि घुमेर खेलाडीलाई सुझाव दिइरहेका देखिन्थे।

नेपालले त्यसपछि लगातार विकेट लियो। ४७औं ओभरमा तर सोमपालले पहिलो बल डट फालेर लगातार दुई विकेट लिए। यससँगै मलेसिया सात विकेट गुमाएर २०९ रन बनाएको थियो। जतिबेला फित्री साम शून्यमै आउट भएका थिए भने खिजर हयातले २२ रन बनाएका थिए।

यसरी नेपालका लागि सोमपालले धेरै विकेट लिए भने ललित राजवंशीले किफायती बलिङ गरे। सन्दीपले अन्तिम ओभरमा दुई विकेट लिएपछि उनले व्यक्तिगत तीन विकेट लिए। यससँगै मलेसियाले आठ विकेट गुमाएर २३४ रन बनायो।