जंगली हात्तीकाे आक्रमणबाट श्रीमतीकाे मृत्यु, श्रीमान् घाइते

काठमाडौँ- झापाको शिवसताक्षीमा जङ्गली हात्तीको आक्रमणबाट १ जनाको मृत्यु भएको छ। मृत्यु हुनेमा स्थानीय ६० वर्षीय पवित्रा भेट्वाल रहेको प्रहरीले जनाएको छ।

शिवसताक्षी ११ उत्तर रतुवामाई आयोजनाको बन क्षेत्रमा दाउरा खोज्न गएका उनको बुधबार साँझ जङ्गली हात्तीको आक्रमणबाट मृत्यु भएको हो।

उनका श्रीमान दिलीप भेट्वाल सक्त घाइते भएका छन्। उनलाई उपचारका लागि बिर्तामोड स्थित बिर्तासिटी अस्पताल लगिएको छ। भेट्वाल दम्पत्ती बुधबार दिउँसो दाउरा खोज्न गाउँसँगै जेडिएको नजिकैको वनमा गएका थिए।

श्रीमान साइकलमा र श्रीमतीले डोकोमा दाउराको भारी हाल्दै गर्दा आक्रमण गरेको स्थानीयले बताए। श्रीमतीलाई हात्तीले लछारपछार पारेपछि श्रीमान भाग्न सफल भएका थिए। श्रीमानलाई पनि हात्तीले आक्रमण गरेको छ।

घटनास्थलमा इलाका प्रहरी झिलझिलेको टोलीले कानुनी प्रक्रिया सुरु गरेको छ। घटनास्थलदेखि नजिकै अझै पनि दुई वटा हात्ती छन्। स्थानीयका अनुसार दुई वटा जङ्गली हात्तीले बुधबार साँझ ५ः५० मा आक्रमण गरेका थिए।