उच्च अदालतमा जवाफ पेस गर्दै बालेनले भने- कानुन हातमा लिन खोजियो

काठमाडौँ- काठमाडौं महानगरपालिकाका मेयर बालेन्द्र शाह (बालेन) सहित ४ जनाविरुद्ध उच्च अदालत पाटनमा परेको मुद्दा खारेज गर्न माग गर्दै लिखित जवाफ पेस भएको छ। शुक्रबार उनीहरूले लिखित जवाफ अदालतमा पेस गरेका हुन्।

महानगरका मेयर बालेन्द्र शाहले पेस गरेको जवाफमा ऐतिहासिक, धार्मिक तथा सांस्कृतिक सम्पदा, नेवाः सभ्यता राष्ट्रिय सम्पत्ति तथा स्रोत साधनको संरक्षण गर्ने दायित्वबाट विमुख बनाउने उद्देश्यले रिट दायर गरिएको जिकिर गरेका छन्।

‘गैरसुकुम्बासीको योजनामा कानुन हातमा लिने, नदीको जग्गा कब्जा गर्ने, विना स्वीकृति पक्की घर, टहरा, सटर कबल बनाउने, तहतह किनबेच गर्ने, भाडा वा व्यापारीक प्रयोजनमा लगाउने, राज्य संयन्त्रलाई अनुगमन गर्न नदिने, सर्वोच्च अदालतको आदेश कार्यान्वयन गर्न समेत नदिने, घरेलु हतियार तथा विस्फोटक पदार्थसहित आपराधिक बल प्रयोग गर्ने, उक्त क्षेत्रमा सडक, ढल निर्माण, सरसफाइ तथा ढल प्रशोधन प्लान्ट, सम्पदा संरक्षण, शहरी सौन्दर्यीकरणको कुनै पनि काम गर्न नदिने जस्ता कानुनद्वारा बर्जित कार्यहरूको समर्थन गर्ने विपक्षीको रिट निवेदन भित्रको मनसाय प्रश्नयोग्य छ,’ बालेनले दिएको लिखित जवाफमा भनिएको छ ।

वास्तविक भूमिहीन जोगाउने भन्दा पनि अनाधिकृत बस्ती जोगाउने प्रयास भएको बालेनको भनाइ छ। ‘वास्तविक भूमिहीन सुकुम्वासी जोगाउने भन्दा पनि समग्ररुपमा अनाधिकृत बस्ती जोगाउने उद्देश्य अन्तर्निहित देखिन्छ। यी कारणबाट रिट निवेदकको सरोकार प्रचलित कानुन तथा सर्वोच्च अदालतबाट जारी भएका न्यायिक आदेश, फैसला एवं प्रतिपादित नजिर सिद्धान्तसम्मत नभएको हुँदा रिट निवेदन प्रथम दृष्टिबाटै खारेजभागी छ, खारेज गरी पाऊँ भनी महानगरले मुद्दा खारेजी गर्नको लागि लिखित जवाफ पेस गरेको हो,’ उनले भनेका छन्।