नेपाल आएको भनिएका अमृतपाल भारतमै पक्राउ

काठमाडौँ- भारतमा पृथकतावादी खालिस्तान अभियान चलाइरहेका अमृतपाल सिंह पक्राउ परेका छन्। आइतबार बिहान भारतको पन्जाबबाट उनलाई पक्राउ गरिएको पन्जाब प्रहरीले जानकारी दिएको छ।

सिंहले मोगा प्रहरीसमक्ष आत्मसर्पण गरेका थिए। यसअघि काठमाडौंस्थित भारतीय दूतावासले सिंह नेपाल आएको भन्दै नेपाल सरकारलाई पत्र लेखेको थियो। उनीविरुद्ध ज्यान मार्ने उद्योग, कानुन कार्यान्वयनमा अवरोध पुर्‍याएको र अशान्ति मच्चाएको आरोप छ।

अमृतपाल भागेर नेपाल आएको हुन सक्ने भन्दै दूतावासले सरकारलाई पत्र लेखेको र भारतीय प्रहरी नेपालसँग कुनै अनुमति नलिई नेपाल आएको दाबी एमाले सांसद रघुजी पन्तले चैत २७ गते गरेका थिए। अनुमति विनै भारतीय सुरक्षा अधिकारी नेपाल आएर नेपालको सुरक्षा संयन्त्रप्रति अविश्वास पैदा गरेको उनको भनाइ थियो।

‘वीरगञ्ज र बाँकेको जमुनाहा नाका भएर भारतीय सुरक्षा संयन्त्रका कर्मचारीहरु नेपाल प्रवेश गरेका छन् र उनीहरु अमृतपाल सिंह खोज्न आएका छन् भन्ने समाचार छापिएका छन्,’ उनले भनेका थिए, ‘कुनै पनि बाह्य देशको सुरक्षाकर्मीलाई नेपालको कानुनले नेपालभित्र पसेर त्यसरी खोजबिन गर्ने अधिकार दिएको छैन।’

अरु देशबाट भागेर आएका अपराधीलाई नेपाल प्रहरीले पक्राउ गरेको बताउँदै उनले भारतीय सुरक्षाकर्मी अनुमति विनै नेपाल प्रवेश गर्नुले सुरक्षा संयन्त्रप्रति अविश्वास उठ्ने दाबी गरे।

‘अरु देशबाट भागेर आएका अपराधीलाई पनि नेपालको सुरक्षा संयन्त्रले पक्रेको छ। उदाहरणको लागि चाल्र्स शोभराजलाई लिन सकिन्छ तर हाम्रो सुरक्षा संयन्त्रप्रति अविश्वास हुनेगरी अहिले भारतीय सुरक्षाकर्मी यहाँ आएर यसरी अमृतपाल सिंहलाई खोजिरहेका छन् भने हाम्रो सुरक्षा संयन्त्रप्रति अविश्वास उठ्यो,’ सांसद पन्तले भनेका थिए।

नेपाल प्रहरीले भने भारतीय सुरक्षा अधिकारी नेपाल नआएको बताएका थिए। प्रहरीले अमृतपाल नेपालमा नरहेको दाबी गरेको थियो। भारतमा सन् २०२० को किसान आन्दोलनका क्रममा अभियन्ता सन्दीप सिंहलाई समर्थन गरेपछि उनी चर्चामा आएका थिए।

पञ्जाबको अधिकारका लागि केन्द्रविरूद्ध लड्ने र पञ्जाबको संस्कृति, भाषा र सामाजिक सद्भावविरूद्ध भइरहेको आक्रमणको प्रतिरोध गर्ने अभियान उनले सन् २०२२ मा सुरु गरे। उनले सार्वजनिक रूपमै पनि हिंसाका पक्षमा वकालत गरेको आरोप छ।

पछिल्लो समय उनले शिखहरूको छुट्टै राज्य खलिस्तानको भावना दबाउन नसकिने बताउन थालेका थिए। सुरूमा भारतको पञ्जाबभित्र खलिस्तान बनाउने र पछि पाकिस्तानको पञ्जाबबाट पनि खलिस्तान भूमि गाभ्ने योजना उनले एक अन्तर्वार्तामा सुनाए। यसपछि प्रहरीले उनलाई खोजीसूचीमा राखेको थियो।