फेवाकिनारमा जलकुम्भी पर्यटन [तस्बिरहरू]

पोखरा- पर्यटकीय राजधानी मानिने पोखराको पर्याय बनेको छ फेवाताल। यही फेवा किनारमा पर्ने पोखरा-१८ ढल्केबर (खपौदी) मा जलकुम्भी फुलेको छ।

उक्त फूल हेर्न आन्तरिक तथा बाह्य पर्यटकहरु आउने गरेका छन्। सामाजिक सञ्जालमा फोटो र छोटो भिडियो अपलोड गर्नेहरु पनि प्रशस्तै छन्।

बिदाको दिन भिडभाड हुने गरेको स्थानीय लोकबहादुर जलारी बताउछन्।

जलारीका अनुसार फोटो खिच्नेको भिडले माछा मार्न कार्यमा बाधा परेपनि उनीहरूले माछा किनिदिने गरेका छन्।

जलकुम्भी झारले कुरूप बनाउने गरेको जगजायर नै छ। तर अहिले यही झारले गर्दा पर्यटकको आकर्षण बढेको स्थानीय रणबहादुर थापा बताउँछन्।

पोखरा महानगरपालिकाले पहिले झार व्यवस्थापन गर्न बजेट छुट्टाउने गर्दथ्यो तर महानगरले अहिले बजेट विनियोजन नगर्दा जलकुम्भी झार बढिरहेको हो।

जलारी समुदाय फेवाताल र यससँग जोडिएका ससाना खोला नालासँग आसित्त रहेको छ।

फेवातालमा पछिल्लो समय माछाको प्रजाति र संख्या घट्दै जाँदा पुस्तौंदेखि माछा मारेर जीवन चलाउँदै आएका जलारी समुदाय आफ्नो पेसाबाटै विस्थापित हुने अवस्था आएको स्थानीय कमल जलारी सुनाउँछन्।

फेवाकिनारको सिमसार क्षेत्रमा फैलिएको जलकुम्भी मुख्य ताल क्षेत्रमा नै प्रवेश गर्ने गरेको छ। यसअघि किनारमा आउनेबित्तिकै हटाइने गरेको भएपनि महानगरले यसमा तदारुकता नदेखाउँदा जलकुम्भी बढेको हो।