धुम्बाराहीमा कांग्रेस बैठक, सरकारलाई खबरदारी गर्ने विषय मुख्य एजेन्डा

काठमाडौं– कांग्रेस सभापति शेरबहादुर देउवा निवास धुम्बाराहीमा बसेको पदाधिकारी बैठकले केन्द्रीय समिति, नीति अधिवेशन र सरकारका पछिल्ला गतिविधिबारे समीक्षा गरेको छ।

सभापति देउवा निवास धुम्बाराहीमा अपरान्ह ४ः३० बजेदेखि बसेको बैठकले सरकारमा थप मन्त्री पठाउने, भ्रातृ संस्थाका अधिवेशन, पार्टीभित्रको आन्तरिक बेमेल, उपनिर्वाचन समीक्षालगायत विषयमा छलफल गरेको थियो।

सभापति देउवासहित पार्टीका अधिकांश पदाधिकारी सहभागी बैठकमा कांग्रेसभित्र केन्द्रीय समिति बैठक बोलाउन, सरकारप्रतिको दृष्टिकोण थप प्रस्ट्याउन र नीति अधिवेशन गर्नुपर्ने विषय उठाइएको थियो। कांग्रेसले ८ मन्त्रालय पाए संस्थापन र संस्थापन इतर समूहबीच भागबन्डा नमिलेपछि अहिलेसम्म ५ जना मन्त्री मात्रै सरकारमा सामेल छन्।

पदाधिकारी बैठकमा तीन विषयमा छलफल भएको कांग्रेस नेता धनराज गुरुङले बताए। ‘विशेषगरी नीति महाधिवेशन, सरकारको पर्फमेन्स र भ्रातृ संगठनको पूर्णताबारे बैठकमा छलफल भयो। औपचारिक निर्णय केही पनि भएन,’ उनले भने।

बैठकमा सभापति देउवा, उपसभापतिद्वय पूर्णबहादुर खड्का र धनराज गुरुङ, महामन्त्रीद्वय गगनकुमार थापा र विश्वप्रकाश शर्मालगायत पदाधिकारी उपस्थित थिए। १० वैशाखको उपनिर्वाचनमा हार बेहोरेपछि कांग्रेसभित्र सुधार र रुपान्तरणको बहस छेडिएको छ।

केन्द्रीय कार्यसमिति बैठक बोलाएर उपनिर्वाचनको समीक्षा गर्नुपर्ने र नीति महाधिवेशन मिति तय गर्नुपर्ने दबाब सभापति देउवामाथि दिन थालिएको छ।