कोशी प्रदेश लोक सेवा आयोगको अध्यक्षमा गुरागाईँले लिए शपथ

विराटनगर- कोशी प्रदेश लोक सेवा आयोगको अध्यक्षमा पूर्वसचिव महेन्द्रप्रसाद गुरागाईँलाई नियुक्त गरिएको छ। गुरागाईँले आइतबार पद तथा गोपनीयताको शपथ समेत ग्रहण गरेका छन्।

प्रदेश प्रमुखको कार्यालयमा आइतबार आयोजित समारोहमा उनलाई उच्च अदालत विराटनगरका मुख्यन्यायाधिश रमेश प्रसाद राजभण्डारीले पद तथा गोपनीयताको शपथ गराएका हुन्। साथै समारोहका बिच प्रदेश प्रमुख परशुराम खापुङले उनलाई नियुक्ति पत्र प्रदान गर्दै सफल कार्यकालको शुभकामना तथा बधाई ज्ञापन गरे।

गुरागाईँलाई मुख्यमन्त्री हिक्मतकुमार कार्कीको अध्यक्षतामा आइतबार मुख्यमन्त्री तथा मन्त्री परिषद्को कार्यालयमा बसेको सिफारिस समितिको बैठकले लोक सेवा आयोगको अध्यक्षमा नियुक्ति गर्न सिफारिस गरेको थियो। लामो समय निजामती सेवामा काम गरेका गुरागाईँसँग लोक सेवा आयोगमा काम गरेको अनुभव पनि छ। उनले दुई वर्षअघि मात्रै सेवाबाट अवकाश लिएका थिए।

तेह्रथुमको म्याङ्लुङ पुरानो घर भएपनि उनको परिवार हाल मोरङको उर्लाबारीस्थित मंगलबारेमा बस्दै आएको छ। सिफारिस समितिमा मुख्यमन्त्री, प्रदेश सभाका सभामुख र विपक्षी दलका नेता रहने कानुनी व्यवस्था छ। प्रदेश लोक सेवा आयोग ऐन २०७६ अनुसार आयोगको अध्यक्ष समयावधि ६ वर्षको हुन्छ। यसअघिका अध्यक्ष उत्तम भट्टराईले उमेर हदका कारण अवकाश लिएका थिए।

समारोहमा प्रदेश सरकारका मुख्यमन्त्री हिक्मतकुमार कार्की, सभामुख अम्बरबहादुर बिष्ट, मन्त्री तथा राज्यमन्त्रीहरु, विभिन्न मन्त्रालयका सचिव लगायतको उपस्थिति रहेको थियो।