मुखमा पट्टी बाँधेर सहकारी पीडितको मानवसाङ्लो [फोटो फिचर]

काठमाडौँ- सहकारी पीडितले मानव साङ्लो बनाएर विरोध गरेका छन्। सरकारसँग सहकारी समस्या समाधान गर्न सहमति भएको ६५ दिन पुग्दासमेत सरकारले कुनै कारबाही अघि नबढाएको भन्दै पीडितले मानव साङ्लो बनाएर प्रदर्शन गरेका हुन्।

सहकारी बचतकर्ता संरक्षण राष्ट्रिय अभियानले रत्नपार्कदेखि मानव साङ्लो बनाएर विरोध प्रदर्शन गरेका हुन्। जेठ १० यता उनीहरू लगातार आन्दोलनमा बसेका छन्।

सहकारी बचतकर्ता संरक्षण राष्ट्रिय अभियान महासंघमा आबद्ध ३५० वटा सहकारीका १४ लाख मानिसहरूले आन्दोलनमा समर्थन जनाउँदै आएका छन्।

महासंघका अनुसार सहकारीले दुई खर्ब ५० अर्ब बराबर रकम ठगी गरेका छन्। यसअघि गत चैत ८ गते भूमि व्यवस्था, सहकारी तथा गरिबी निवारण मन्त्रालय र पीडितबीच समस्या समाधानको लागि सहमति भएको थियो।

अधिकार सम्पन्न छानबिन समितिको गठन गर्ने, समस्याग्रस्त सहकारी व्यवस्थापन समितिलाई सुदृढीकरण गरेर समस्याग्रस्त घोषणा गरिएका सहकारी संस्थाको सम्पत्ति र दायित्वको व्यवस्थापन गरेर पीडितहरूको बचत फिर्ता गर्ने त्यसबेला समझदारी भएको थियो।

यसअघि समस्या समाधानको लागि राष्ट्रिय योजना आयोगका सदस्य डा जयकान्त राउतको संयोजकत्वमा बनाएको कार्यदलले समाधानका लागि विभिन्न सुझाव दिएको थियो।

यसमा सहकारीहरूलाई २०८० कात्तिकभित्र बचत फिर्ता कार्ययोजना पेस गर्न लगाउने, मंसिर मसान्तसम्म स्वेतपत्र जारी गर्न लगाउने र चैतभित्र बचत फिर्ता गर्न सुरू गर्ने गरी काम गर्न सुझाव दिएको थियो।

यस्तै समस्याग्रस्त सहकारीका विषयमा छानबिन गर्न र बचतकर्ताको रकम फिर्ता गर्न सुझाव दिने गरी संसदीय कार्यदल गठन भएको छ।

तस्बिर : नेपाल फाेटाे लाइब्रेरी