सम्बन्ध विच्छेदको मुद्दा चलिरहेको थियो, श्रीमानले श्रीमतीको हत्या गरे

पोखरा- पोखरा महानगरपालिका ८ बगालेटोलमा श्रीमतीको हत्या गरेको आरोपमा श्रीमान पक्राउ परेका छन्।

जिल्ला प्रहरी कार्यालय कास्कीका अनुसार पक्राउ पर्नेमा अन्दाजी ४२ वर्षीय जहर कुँवर रहेका छन्।

कास्कीको अन्नपूर्ण गाउँपालिका–१ नौडाँडा घर भई पोखरा–८ बगालेटोल बस्ने कुँवरले अन्दाजी ४० वर्षीया राधिका कुँवरलाई धारिलो हतियार प्रहार गरेर हत्या भएको देखिएको छ।

घरायसी विवाद बढ्दै जाँदा श्रीमानले श्रीमतीको हत्या गरेको देखिएको प्रहरीले जनाएको छ। उनीहरुका एक छोरा छन्।

कुँवर मानसिक स्वास्थ्य समस्याबाट पीडित भएको खुलेको छ।

वैदेशिक रोजगारीबाट फर्केका श्रीमान जहरसिंह कुँवर डिप्रेसनको सिकार थिए।

उनले नियमित औषधीसमेत लिने गरेको कास्की प्रहरीको प्रारम्भिक अनुसन्धानमा खुलेको छ।

श्रीमान जहरसिंहले दिउँसो सामान्य विवादमा श्रीमती राधिका कुँवरको हत्या गरेका थिए।

कुँवर श्रीमान/श्रीमतीबीच दिनहुँजसो झैझगडा हुने गरेको थियो। सोही कारण उनीहरुबीच सम्बन्धविच्छेदको प्रक्रिया पनि अदालतमा चलिरहेको थियो।

अदालतको आदेश नआउञ्जेल सँगै बस्ने भन्ने सहमतिअनुसार उनीहरु एउटै घरभान्छा प्रयोग गर्थे।

बुधबार दिउँसो श्रीमती राधिका घरबाट बाहिर निस्कन खोजेकी थिइन्। त्यो थाहा पाएपछि श्रीमान जहरसिंहले रोक्न खोजेका थिए।

त्यस क्रममा विवाद शुरु भएको कास्की प्रहरीको प्रारम्भिक अनुसन्धानमा खुलेको छ।

विवाद भएपछि श्रीमानले गालीगलौजसमेत गरेका थिए। जहरले खुकुरी प्रहार गरी हत्या गरेको कास्कीका प्रहरी प्रमुख प्रहरी उपरीक्षक मोहनकुमार थापाले जानकारी दिए।

जहरसिंहले दिउँसो १२ः१० मा श्रीमतीलाई घाँटी र पेटमा खुकुरी प्रहार गरेका थिए।

श्रीमानको खुकुरी प्रहारबाट गम्भीर घाइते भएकी श्रीमती राधिकाको उद्धार गरेर उपचारका लागि पोखरा स्वास्थ्य विज्ञान प्रतिष्ठान अन्तर्गतको पश्चिमाञ्चल क्षेत्रीय अस्पताल लगिएको थियो।

चिकित्सकले दिउँसो १२ः४४ मा मृत घोषणा गरेको उनले जानकारी दिए।

श्रीमानले पेटमा खुकुरीको प्रहार गरी घाइते बनाएका थिए।

हत्या अभियोग लागेका जहरसिंहलाई पक्राउ गरेर अनुसन्धान शुरु गरिएको एसपी थापाले बताए।

उनले घटनास्थलबाट हत्यामा प्रयोग गरिएको एक थान खुकुरीसमेत बरामद गरिएको जानकारी दिए।

घटनाबारे कास्की प्रहरीले अनुसन्धान शुरु गरेको जनाएको छ।