क्यानडाको लिग-२ सिरिजमा ओमानसँग अन्तिम खेल खेल्दै नेपाल

क्यानडा भ्रमणमा रहेको नेपालले लिग-२ अन्तर्गतको त्रिकोणात्मक सिरिजमा अन्तिम खेल खेल्दैछ।

क्यानडामा भएको लिग-२को अन्तिम खेल नेपालले ओमानसँग खेल्दैछ। क्यानडाको ओन्टेरियोमा नेपाली समयअनुसार आज बेलुकी ८:४५ बजे खेल सुरू हुनेछ।

यस सिरिजमा नेपालले अहिलेसम्म खेल जित्न सकेको छैन। नेपालले पहिलो र तेस्रो खेलमा क्यानडा तथा दोस्रो खेलमा ओमानसँग पराजय बेहोर्‍यो। पहिलो खेलमा नेपालले क्यानडासँग १०३ रनको हार बेहोरेको थियो। उक्त खेलमा क्यानडाले दिएको २५४ रनको लक्ष्य नेपालले ४०.१ ओभरमा १ सय ५० रनमै अलआउट भयो।

दोस्रो खेलमा नेपाल ओमानसँग १ विकेटले स्तब्ध भयो। त्यस खेलमा टस हारेर ब्याटिङको निम्तो पाएको नेपालले निर्धारित ५० ओभरमा ९ विकेट गुमाएर २ सय २० रन बनायो । यद्यपि नेपालले त्यो स्कोरको रक्षा गर्न सकेन।

नेपालले तेस्रो खेलमा फेरि खराब ब्याटिङ गर्‍यो। उक्त खेलमा टस जितेर ब्याटिङ रोजेको नेपाल ४६.१ ओभरमा १८१ रनमै अलआउट भयो । नेपाल अब श्रृंखलाको अन्तिम खेलमा जित हात पारेर २ अंक जोड्न चाहन्छ।

उता ओमान पनि नेपाललाई हराएर महत्वपूर्ण २ अंक जोड्ने योजनामा छ। उसले पहिलो खेलमा नेपाललाई हराए पनि दोस्रो खेलमा क्यानडासँग ५९ रनको हार बेहोर्‍यो। र, ओमान मंगलबार नेपाललाई स्तब्ध पार्दै लयमा फर्किन चाहन्छ।

हालसम्म नेपाल र ओमानले ओडिआईमा आठ खेलमा एकअर्काको सामना गरेका छन्, जसमा नेपालले पाँचमा हार बेहोर्दा तीन खेलमा मात्र जित निकालेको छ । नेपाल आज ओमानलाई हराउँदै हेड टु हेड रेकर्डमा पनि सुधार गर्न चाहन्छ।

नेपालले मंगलबार प्लेइङ–११ मा दुई खेलाडी परिवर्तन गर्ने सम्भावना बलियो छ। नेपालले चौथो खेलमा अर्जुन साउद र अनिलकुमार साहलाई विश्राम दिएर कुशल भुर्तेल र दीपेन्द्र सिंह ऐरीलाई मौका दिने सम्भावना रहेको हो।

पछिल्लो दुई खेलमा लगातार मौका पाए पनि अर्जुन र अनिल चलेनन्। अर्जुनले ओमानविरुद्ध ५ तथा क्यानडासँगको खेलमा १० रन मात्र बनाए । यस्तै, अनिलले ओमानविरुद्ध तीन तथा क्यानडासँग एक रन मात्र जोडे।

जारी सिरिजमा मुख्य प्रशिक्षक मोन्टी देसाईले अनिलको भूमिका परिवर्तन गरेका छन्  विगत प्रायः शीर्षक्रममा ब्याटिङ गर्ने उनले यस श्रृंखलामा तल्लोक्रममा ब्याटिङको मौका पाएका छन् । तर, त्यसमा अनिल सफल देखिएका छैनन्।

प्रशिक्षकले मंगलबारको खेलमा अर्जुन र आसिफलाई बाहिर राखेर अनिल र कुशललाई ओपनिङ ब्याटरको जिम्मेवारी दिने सम्भावना पनि छ । यस्तो भएमा अनिलले विकेटकिपिङ पनि गर्ने छन्।

पहिलो खेलमा १ रनमै आउट भएपछि कुशल पछिल्लो दुई म्याचमा लगातार बेन्चमा छन्। उनको विकल्पमा खेलाइएका अर्जुनले पनि खराब लय समातेपछि अन्तिम खेलमा भुर्तेलको कमब्याकको विकल्प छैन।

तालिकाअनुसार लिग-२ नेपालले २७ अक्टोबरमा (कात्तिक ११) अमेरिकासँग, २९ अक्टोबरमा (कात्तिक १३) स्कटल्यान्डसँग, २ नोभेम्बरमा (कात्तिक १७) फेरि अमेरिकासँग र अन्तिम खेलमा ४ नोभेम्बरमा (कात्तिक १९) स्कटल्यान्डसँग प्रतिस्पर्धा हुनेछ।

लिग-२ को एकदिवसीय सिरिज पछि तीनै टोलीबीच टी-२० सिरिज हुनेछ।