लाइभ कन्सर्ट लिएर नेपाल आउँदै सोनु निगम, २ हजारमै यसरी काट्नुहोस् टिकट

काठमाडौँ- आगामी डिसेम्बर २५ मा नेपालमा ‘सोनु निगम लाइभ इन नेपाल’ सांगीतिक कार्यक्रम हुने भएको छ।

हायात रिजेन्सी होटलमा आइतबार एक कार्यक्रमबीच नेपाली टच ‘सोनु निगम लाइभ इन नेपाल’ को औपचारिक घोषणा गरिएको हो।

नेपाली टचले विगत १५ वर्षदेखि अस्ट्रेलियामा विभिन्न कार्यक्रम गर्दै आएको छ। सोनुलाई ल्याएर नेपाली टचले नेपालमा पहिलो पटक संगीत कार्यक्रम गर्न लागेको हो।

कार्यक्रममा बोल्दै ‘नेपाली टच नेपाल’का प्रमुख राजकुमार गोस्वामीले नेपालमा अन्तर्राष्ट्रिय कलाकार भित्र्याउन लागिएको बताए।

‘हामीले १४–१५ वर्षदेखि अस्ट्रेलियामा कार्यक्रम गर्दै आएका छौं। आफ्नो देशमा यस्ता कार्यक्रम आयोजना गर्न खोज्नुभएको हो कि होइन’, उनले भने, ‘हामीले अन्तर्राष्ट्रिय कलाकारलाई नेपालमा ल्याउने माध्यम बनाएका छौं। बलिउडलाई कला र संस्कृतिसँग जोड्ने यो एउटा महत्त्वपूर्ण माध्यम हुनेछ। यसबाट नेपाली पर्यटन प्रवद्र्धनमा सहयोग पुग्ने अपेक्षा गरेका छौं।’

गोस्वामीले क्रिसमस कार्यक्रमका लागि आजबाट टिकट बिक्री सुरु भएको घोषणा पनि गरेका छन्। कार्यक्रममा सहभागी हुन चाहनेहरुले ईसेवामार्फत टिकट खरिद गर्न सक्नेछन्।

कार्यक्रमका लागि चार प्रकारका टिकटको व्यवस्था गरिएको छ।

सामान्य टिकटको लागि २ हजार, फेस्टिभ प्लेटिनमको लागि ४ हजार, फेस्टिभ भीआईपी सिटिङका लागि १० हजार र फेस्टिभ भीआईपी टुरको लागि ५० हजार छ।

प्लेटिनम टिकट अनुसार सिटिङ टिकट खरिद गर्ने सबै टिकट खरिदकर्ताले एउटा खाना र पेय पदार्थ निःशुल्क पाउनेछन्।

दसैँतिहारको अवसरमा चाडपर्वको अवसरलाई मध्यनजर गर्दै निश्चित सङ्ख्याको टिकटमा मात्रै यो शुल्क लाग्ने आयोजकले जानकारी दिएको छ।

भीआईइीले ५० हजार रुपैयाँको टेबुल र ६ वटा कुर्सी पाउनेछन्।

टिकटिङ पार्टनर सेवाका कार्यक्रम प्रमुख गौरीशंकर दाहालले सोनु निगमसँग आबद्ध हुन पाएकोमा खुशी व्यक्त गर्दै पहिलो पटक यस्तो ठूलो कार्यक्रमको आवश्यकता महसुस गरेका थिए।

‘मलाई पहिलो पटक राम्रो उपहारको आवश्यकता महसुस भयो। नेपाली टच जस्ता ठूला कम्पनीसँग सोनु निगमजस्ता अन्तर्राष्ट्रिय कलाकार आबद्ध हुन पाउँदा यो कम्पनी खुसी छ,’ उनले भने, ‘हामीले टिकट बिक्रीलाई सबैको पहुँचमा पुर्या‍उने तयारी गरेका छौं।’

यसका साथै काठमाडौं बाहिरका आगन्तुकका लागि सेवा होटल, बस सेवा, टिकट जस्ता सेवा पनि खोल्ने योजनामा रहेको उनले बताए।

कार्यक्रमको हस्पिटालिटी पार्टनर हायात रिजेन्सीका सेल्स एण्ड मार्केटिङ हेड अमित वालियाले कार्यक्रममा आबद्ध हुन पाउँदा खुसी लागेको बताए। उनले सोनु निगमलाई नेपाललाई उत्कृष्ट व्यवसायी बनाउन कुनै कसर बाँकी नराख्न आग्रह गरे।

त्यसैगरी ‘नेपाली टच’ मार्फत विभिन्न कार्यक्रममा सहभागी भईरहेका चर्चित टेलिभिजन प्रस्तोता तथा स्ट्यान्डअप कमेडियन सन्दीप क्षेत्रेले ‘नेपाली टच–नेपाल’ लाई नयाँ सुरुवातको शुभकामना दिएका छन्।