सन् २०५० सम्म जनसांख्यिकीय लाभांश छ, यसैले आर्थिक विस्तार गर्छ : अर्थमन्त्री महत

काठमाडौं- अर्थमन्त्री डा. प्रकाशशरण महतले सन् २०५० सम्म देशमा जनसांख्यिक लाभ भएको बताउँदै यसैले आर्थिक विस्तार गर्ने बताएका छन्। लगानी बोर्ड नेपालको आयोजनामा नेपालमा लगानीका लागि अन्तर्राष्ट्रिय सम्मेलन कार्यक्रमलाई शुक्रबार राजधानीमा सम्बोधन गर्दै मन्त्री डा. महतले यस्तो बताएका हुन्।

अहिले सरकारले ऋण र कुल गार्हस्थ्य उत्पादन (जिडिपी) अनुपात दिगो रहने गरी काम गर्ने योजना बनाएको उनको भनाइ छ। ‘सहज स्थितिमा बाह्य ऋण दायित्वले नेपाललाई कुनै तनावको स्थिति थिएन,’ मन्त्री डा. महतले भने, ‘तर अहिले सबै कुरा अनुकूल छैन। समग्र पक्षको विचार गरेर सरकारले काम गर्छ।’

उच्च सम्भावित जनसांख्यकीय लाभांश नेपालमा हुनु सकारात्मक भएको उनको भनाइ छ। ‘नेपालको औसत उमेर २६ वर्ष मुनिको छ र राष्ट्रिय योजना आयोगले सन् २०५० सम्म देशमा जनसांख्यिक लाभांश कायम रहने प्रक्षेपण गरेको छ,’ मन्त्री महतले थपे, ‘हामीसँग अझै पनि पर्याप्त युवा जनसङ्ख्या हुनेछ। जसले आगामी दिनको लागि देशको आर्थिक गतिविधिलाई सहयोग गर्नेछ।’

स्रोतसाधनको अधिकतम उपयोग गर्नु चुनौतीपूर्ण भएको बताएका मन्त्री महतले शक्तिलाई पूर्ण रूपमा पुँजीकरण गर्न नसकेका स्वीकार गरे। ‘हामीसँग ३० लाखभन्दा बढी वैदेशिक रोजगारीमा रहेका आप्रवासी कामदारहरू छन्, यसले कुनै न कुनै रूपमा रेमिट्यान्सको रूपमा हाम्रो अर्थतन्त्रलाई टेवा पुर्याइरहेको छ जसलाई उत्पादनशील क्षेत्रमा लगानी गर्न पनि पर्याप्त रूपमा प्रयोग गर्न सकेका छैनौं,’ मन्त्री डा. महतले भने, ‘नवीकरणीय ऊर्जासहित दिगो वित्तको लागि हाम्रो अपार सम्भावना विश्वको लागि उदाहरण हो।’