डडेल्धुराको उग्रतारा मन्दिरमा चोरी

डडेल्धुरा- सुदूरपश्चिमकै प्रसिद्ध ऐतिहासिक उग्रतारा मन्दिरमा चोरी भएको छ। अमरगढी नगरपालिका–८ मा रहेको मन्दिरमा चोरी भएको हो।

जिल्ला प्रहरी कार्यालयका अनुसार  शनिबार बिहान रातको समयमा १ः३० बजे चोरी भएको हो। कार्यालयका प्रमुख प्रहरी नायब उपरीक्षक मनोहरप्रसाद भट्टका अनुसार चाँदीको माला, चाँदीको मुकुटलगायतका सामान चोरी भएको जनाइएको छ।

चोरीको खबर प्राप्त भएपछि प्रहरी टोली पठाइएको डिएसपी भट्ट मन्दिर पगेका थिए। उग्रतारा क्षेत्र विकास समितिका अध्यक्ष तेजबहादुर सार्कीले चाँदीका पूजाका सामान चोरी भएको जानकारी दिए। मन्दिरमा सिसी क्यामेरा पनि जडान गरिए पनि पूर्णरुपमा सञ्चालनमा नभएकाले खोजीमा समस्या परेको प्रहरीको भनाइ छ।

उग्रतारा भगवती मन्दिर प्यागोडा शैलीमा निर्मित छ। अमरगढी–८ मा पर्ने प्रसिद्ध यो मन्दिर सदरमुकामबाट करिब पाँच किलोमिटर टाढा डडेल्धुरा–बैतडी जोड्ने महाकाली राजमार्गको पश्चिमपट्टिको रमणीय फाँटमा अवस्थित छ।