कुशलको अर्धशतकमा चितवनले जनकपुरलाई पस्कियो १८१ रनको लक्ष्य

काठमाडौँ- कुशल मल्लले प्रतियोगिताको पहिलो अर्धशतक बनाएपछि चितवन राइनोजले एनपीएलमा जनकपुर बोल्टसलाई १८१ रनको लक्ष्य दिएको छ।

टस जितेर पहिले ब्याटिङ गरेको चितवनले कशुलको ७२ रनको मद्दतमा ५ विकेट गुमाएर १८० रन बनाएको हो।

मल्लले ४१ बल खेल्दै ३ चौका र ७ छक्का प्रहार गरे। रवि बोपाराले ४४ र हसन इसाखिलले २८ रन जोडे।

बलिङमा जनकपुरका लागि ललित राजवंशीले २ विकेट लिए। अन्य बलरहरु महँगा बन्दा ललितले किफायती बलिङ गर्दै ४ ओभरमा २ ओभर मेडन राखेर जम्मा ११ रन खर्चिए। उनले आफ्नो सुरुको दुई ओभर नै मेडन राखेका थिए। चार ओभर स्पेलमा जम्मा एक चौका खर्चेका थिए।

मल्लले रवि बोपारासँग चौथो विकेटका लागि ११३ रनको साझेदारी गरेका थिए।

चौथो विकेटका लागि एनपीएलमा भएको यो दोस्रो शतकीय साझेदारी हो भने चौथो विकेटका लागि उच्च साझेदारी हो।

यसअघि लुम्बिनीका रोहित पौडेल र टम मुर्सले पोखरा एभेन्जर्सविरुद्ध चौथो विकेटका लागि ११० रनको साझेदारी गरेका थिए।