फाइनलमा पुग्यो सुदूरपश्चिम, जनकपुरले कर्णालीसँग क्वालिफायर खेल्ने

काठमाडौँ- सुदूरपश्चिम रोयल्स नेपाल प्रिमियर लिग (एनपीएल)को फाइनलमा प्रेवेश गरेको छ। क्वालिफायर राउन्डको दोस्रो खेलमा जनकपुर बोल्टसलाई हराउँदै सुदूरपश्चिम रोयल्स फाइनल पुगेको हो।

बुधबार त्रिवि क्रिकेट मैदानमा भएको पहिलो क्वालिफायर खेलमा सुदूरपश्चिम ८ विकेटले विजयी भएर फाइनल प्रवेश गरेको हो।

जनकपुर बोल्टसले दिएको १३९ रनको लक्ष्य पछ्याएको सुदूरपश्चिमले १८.३ ओभर खल्दै लक्ष्य चेज गरेको थियो।

सुदूरपश्चिमका विनोद भण्डारीले ५८ रन बनाउँदा साइफ जाइबले ३२ रन बनाएका थिए। यस्तै दीपेन्द्रसिंह ऐरीले २० रन र ब्रान्डन म्याकमलेनले २५ रन जोडेका थिए।

बलिङतर्फ जनकपुरका ललित राजवंशी र किशोर महतोले एकएक विकेट लिएका थिए।

यसअघि टस जितेर ब्याटिङ रोजेको जनकपुरले निर्धारित २० ओभर खेल्दै ९ विकेटको क्षतिमा १४० रनको लक्ष्य दिएको थियो।

जनकपुरका जेम्स निसमले सर्वाधिक ४५ रन बनाए। शुभ कंसाकारले २६ रनको योगफल तयार पारेका थिए।

यस्तै लाहिरू मिलान्था र हर्ष थाकरले समान १२-१२ रन बनाउँदा आसिफ शेख र अरनिको यादवले ११-११ रन बनाएका थिए। बाँकी खेलाडीले दोहोरो रन भेट्टाउन सकेनन्।

बलिङतर्फ सदूरपश्चिमका दीपेन्द्रसिंह ऐरीले तीन विकेट लिएका थिए।

साइफ जाइबले २ विकेट लिँदा अविनाश बोहरा र स्कट कुगेलेइनले समान एकएक विकेट लिएका थिए।

क्वालिफायर खेलमा पराजित जनकपुरले इलिमिनेटरमा विजयी कर्णालीसँग खेल्नेछ। यो खेलबाट विजेता बनेको टोलीले सुदूरपश्चिमसँग फाइलन खेल्नेछ।

यसअघि आजै भएको इलिमिनेटर राउन्डको खेलमा कर्णाली याक्स विजयी हुँदै क्वालिफायरमा प्रवेश गरेको थियो। १७६ रनको लक्ष्य पछ्याएको चितवनलाई कर्णालीले २१ रनले पराजित गरेको हो।

चितवनले निर्धारित २० ओभर खेल्दै ९ विकेटको क्षतिमा १५४ रन मात्र बनाउन सकेपछि कर्णाली विजयी भएको थियो।

बिहान ९ बजे सुरु भएको खेलमा चितवनका राइनोजका रवि बोपाराले खेलमा अर्धशतक पूरा गरेका थिए। उनले ३४ बल खेल्दै ३ चौका र ४ छक्काको मद्दतमा उनले ५३ रन जोडर आउट भए। कुशल मल्लले २१ रन बनाउँदा अन्य खेलाडीले २० रन कटाउन सकेनन्।

बलिङतर्फ जिसन मक्सुदले ३, सोमपाल कामी र नन्दन यादवले २-२ विकेट लिए। यस्तै विपीन शर्माले १ विकेट लिएका थिए।

बुधबार बिहान त्रिवि क्रिकेट मैदानमा भएको खेलमा कर्णालीले निर्धारित २० ओभर खेल्दै ६ विकेटको क्षतिमा १७५ रन बनाएको थियो।

खेलमा कर्णालीका विलियम बोसिस्टोले अर्धशतक पूरा गरेका थिए। उनले ३ चौका र २ छक्काको मद्दतमा ३९ बलमा ५२ रन जोडका थिए।

बिहानको खेलमा जयकिसन कोलसावालाले पनि अर्धशतक पूरा गरेका थिए। ३९ बलमा ६ चौका र २ छक्काको मदतमा उनले ५३ रन बनाएका थिए।

कर्णाली याक्सका चाडविक वाल्टन भने ४ रनले अर्धशतक बनाउनबाट चुके। बलिङतर्फ चितवनका सोयल तनवीरले २ विकेट लिँदा शरद भेस्वाकर, रवि बोपारा र कुशल मल्लले समान एकएक विकेट लिएका थिए।

चितवन भने प्रतियोगिताबाट बाहिरिएको छ। क्वालिफायर राउन्डको पहिलो खेलमा पराजित जनकपुरले कर्णालीसँग फेरि अर्को क्वालिफायर खेल खेल्नेछ। दोस्रो क्वालिफायर खेल विजेताले फाइनल पुगेको सुदूरपश्चिमसँग उपाधिका लागि प्रतिस्पर्धा गर्नेछ।

एनपीएलको फाइनल खेल शनिबार हुने तय छ।