भारत-पाकिस्तान किचलोः सन् २०२७ सम्म पाकिस्तानले भारतीय भूमिमा क्रिकेट नखेल्ने

एजेन्सी – भारत र पाकिस्तानका टिमले फेरि एकअर्काको देशमा क्रिकेट नखेल्ने बताएका छन्।

च्याम्पियन्स ट्रफी २०२५ मा भारतका सबै खेलहरू तटस्थ स्थान (न्युट्रल भेन्यु) हरूमा खेलिनेछन्। पाकिस्तानी टोली पनि सन् २०२७ सम्म कुनै पनि प्रतियोगिताका लागि भारत नआउने भएको भारतीय सञ्चारमाध्यमले जनाएका छन्।

आईसीसीको यो निर्णयको जानकारी बिहीबार सार्वजनिक भएको हो। यसअघिको बैठकले यस्तो निर्णय गरेको थियो। सन् २०२५ मा महिला एकदिवसीय विश्वकप भारतमा अनि सन् २०२६ मा टी-२० विश्वकप भारत र श्रीलंकामा आयोजना हुँदैछ।

यसअघि, जब आईसीसीले पाकिस्तान क्रिकेट बोर्ड (पीसीबी) लाई हाइब्रिड मोडलमा च्याम्पियन्स ट्रफी २०२५ आयोजना गर्नेबारे बताएको थियो। त्यसपछि पीसीबीले टोलीलाई भारत नपठाउन आईसीसीसमक्ष माग राखेको थियो, जुन अहिले आईसीसीले स्वीकार गरेको हो।

आईसीसी बोर्डले महिला विश्वकप २०२८ पाकिस्तानमा हुने पुष्टि गरेको छ। यस प्रतियोगितामा भारत र पाकिस्तानको महिला टोलीको खेल पनि तटस्थ स्थानमा हुने जनाइएको छ।

आईसीसीका नवनियुक्त अध्यक्ष जय शाहको उपस्थितिमा डिसेम्बर ५ मा बोर्डका सबै सदस्यको बैठक बसेको थियो। शाह यसै महिना दुबईस्थित मुख्यालय पनि पुगेका थिए। बैठकमा सबै १५ बोर्ड सदस्यले हाइब्रिड मोडलमा सहमति जनाएका थिए। बैठकमा पाकिस्तानले पनि उक्त निर्णयको विरोध गरेको छैन।