अमेरिकाले भन्यो- पाकिस्तानको लामो दूरीको क्षेप्यास्त्र हाम्रो लागि खतरा बन्दैछ

एजेन्सी – अमेरिकी उपराष्ट्रिय सुरक्षा सल्लाहकार (डेपुटी एनएसए) जोन फिनरले बिहीबार पाकिस्तानको उन्नत क्षेप्यास्त्र कार्यक्रम अर्थात् लामो दूरीको ब्यालिस्टिक मिसाइलको कार्यक्रम अमेरिकाका लागि खतरा भएको बताएका छन्। यससँग सम्बन्धित प्रविधि पाकिस्तानले लिएको फाइनरले बताए।

यो प्रविधिबाट बनेको मिसाइलले एसियाली देश मात्र नभई अमेरिकालाई पनि आक्रमण गर्न सक्छ। फाइनरले भने, ‘यसले पाकिस्तानको नियतमाथि प्रश्न खडा गरेको छ। यद्यपि पाकिस्तानले यस्तो क्षेप्यास्त्र बनाएको हो वा होइन भन्ने अझै स्पष्ट भइसकेको छैन।’

जोन फाइनर वासिङ्टनस्थित थिंक ट्यांक कार्नेगी एन्डाउमेन्ट फर इन्टरनेशनल पिसमा भाषण दिन आएका थिए।

फाइनरले पाकिस्तान अमेरिकाको सुरक्षाका लागि खतरा जस्तो देखिने बताए। फाइनरका अनुसार आणविक हतियार भएका र अमेरिकामाथि मिसाइल आक्रमण गर्ने क्षमता जम्मा तीन वटा देश छन्। जसमा रुस, चीन र उत्तर कोरिया पर्छन्। तीनै देश अमेरिकाविरुद्ध छन्। यस्तो अवस्थामा पाकिस्तानको यो कदम अमेरिकाका लागि नयाँ चुनौती बनिरहेको छ।

पाकिस्तानका ४ रक्षा कम्पनीलाई प्रतिबन्ध

बुधबार अमेरिकाले लामो दूरीको मिसाइल बनाउने पाकिस्तानका चार रक्षा कम्पनीलाई प्रतिबन्ध लगाएको थियो। यसमा पाकिस्तानको सरकारी एयरोस्पेस र रक्षा एजेन्सी, नेशनल डेभलपमेन्ट कम्प्लेक्स (एनडीसी) पनि छ। यसबाहेक एफिलिएट्स इन्टरनेशनल, अख्तर एन्ड सन्स प्राइभेट लिमिटेड, रकसाइड इन्टरप्राइजलाई पनि प्रतिबन्ध लगाइएको छ।

समाचार एजेन्सी एएनआईले अमेरिकालाई उद्धृत गर्दै भनेको छ- चार प्रतिबन्धित कम्पनीहरूले पाकिस्तानको ब्यालिस्टिक मिसाइल कार्यक्रमका लागि आवश्यक उपकरणहरू उपलब्ध गराउँदै आएका छन्। अमेरिकाले भविष्यमा पनि यस्ता गतिविधिविरुद्ध कारबाही जारी राख्नेछ।