सीले पुटिनलाई पठाए नयाँ वर्षको सन्देश, युक्रेन युद्धबारे के भने?

मस्को- चिनियाँ राष्ट्रपति सी जिनपिङले रुसी समकक्षी भ्लादिमिर पुटिनलाई नयाँ वर्षको सन्देश पठाएका छन्।

चिनियाँ सरकारी प्रसारक सीसीटीभीले सीले पुटिनलाई सन्देश पठाएको समाचार प्रसारण गरेको हो। सन्देशमा सीले ‘विश्व शान्ति’ प्रवर्द्धन गर्ने प्रतिबद्धता व्यक्त गरेका छन्।

‘अन्तर्राष्ट्रिय परिस्थिति जस्तोसुकै परिवर्तन भए पनि चीन सुधारलाई थप व्यापक रूपमा गहिरो बनाउन र विश्व शान्ति तथा विकासलाई प्रवर्द्धन गर्न दृढ रहनेछ,’ सीले पठाएको सन्देशमा रहेको सीसीटीभीले उल्लेख गरेको छ।

सन् २०२२ फेब्रुअरीमा छिमेकी युक्रेनमा पुटिनले पूर्ण आक्रमण गरेपछि चीनले संयुक्त राज्य अमेरिका र अन्य पश्चिमी राष्ट्रहरूको विपरीत आफूलाई तटस्थ पक्षका रूपमा प्रस्तुत गर्न खोजेको छ।

तर चीन रुसको घनिष्ठ राजनीतिक र आर्थिक साझेदार बनेको छ। जसका कारण केही नाटो सदस्यहरूले बेइजिङलाई युद्धको ‘सक्षमकर्ता’ ब्रान्ड गर्न प्रेरित गरेका छन्। युद्धलाई बेइजिङले निन्दा गरेको छैन।

सीसीटीभीका अनुसार सीले पुटिनलाई पठाइएको सन्देशमा भनिएको छ, ‘एक शताब्दीमा नदेखिएका तीव्र विकासोन्मुख परिवर्तनहरू र अशान्त अन्तर्राष्ट्रिय परिस्थितिको सामना गर्दै चीन र रूस गुटनिरपेक्षता, गैरटकराव र कुनै तेस्रो पक्षलाई लक्षित नगर्ने सही मार्गमा निरन्तर हातेमालो गर्दै अघि बढेका छन्।’

दुवै राष्ट्रपतिबीच सहज सम्बन्ध छ। सीले आफ्ना रूसी समकक्षीलाई आफ्नो ‘सबैभन्दा असल मित्र’ भनेका छन्।

युक्रेनमा रूसको युद्धले प्रदर्शित गरे जस्तै पश्चिमी देशहरूसँग बढ्दो तनावको एक दशकका बावजुद उनीहरूको सम्बन्ध स्थिर रहेको छ।

‘दुई देशबीचको सम्बन्धमा नयाँ महत्त्वपूर्ण कोसेढुङ्गाको प्रतिनिधित्व गर्दै’ सन् २०२४ मा चीन र रुसबीच कूटनीतिक सम्बन्ध स्थापनाको ७५औँ वार्षिकोत्सव भएको कुरा सीले पुटिनलाई उल्लेख गरेका छन्।

‘साढे तीन दशकको उतारचढावपछि, चीनरूस सम्बन्धहरू अझ परिपक्व र स्थिर बन्दै गएका छन्,’ सीले भनेका छन्।