तिब्बतमा भूकम्पका कारण ज्यान गुमाउनेको संख्या ९५ पुग्यो, नेपालमा के-के भयो?

काठमाडौँ- चीनको तिब्बत प्रान्तमा मंगलबार बिहान गएको भूकम्पमा परी मृत्यु हुनेको संख्या ९५ पुगेको छ।

तिब्बतको शिजाङलाई केन्द्रबिन्दु बनाएर आएको भूमक्पमा परी कम्तीमा १३० जना घाइते भएको समाचार बीबीसीले प्रकाशन गरेको छ।

मंगलबार बिहान स्थानीय समय अनुसार ९ बजेतिर जमिनबाट १० किलोमिटर मुनि भूकम्पको केन्द्रबिन्दु थियो।

अमेरिकी भौगर्भिक अध्ययन संस्था युएसजीएसका अनुसार भूकम्प ७.१ म्याग्निच्युडको थियो।

भूकम्पको प्रभाव नेपाल, भुटान, सिक्किम र भारतको उत्तराखण्डमा पनि महसुस भएको थियो।

पहिलो भूकम्पलगत्तै यस क्षेत्रमा थप परकम्प गइरहेको युएसजीएसको रिपोर्टमा उल्लेख छ।।

स्थानीय अधिकारीहरूले निरन्तर स्थितिको जानकारी लिइरहेका छन्, जसका कारण मृत्यु हुनेको संख्या पनि लगातार बढिरहेको छ।

सोही भूकम्पका कारण नेपालको सोलुखुम्बु जिल्ला थुलुङ दूधकोशी गाउँपालिका र खुम्बु पासाङल्हामु गाउँपालिकामा दुई वटा घरमा क्षति पुगेको छ।

थुलुङ दूधकोशी–७ देउसा लुरुवाका ५० वर्षीय हर्कबहादुर खत्रीको ढुङ्गामाटोको गारो र ढुङ्गाकै छानो भएको दुईतले घरमा क्षति पुगेको प्रहरीले जनाएको छ।

खुम्बु पासाङल्हामु गाउँपालिका–५ हेलाजुङ बस्ने आङङिमा शेर्पाको ढुङ्गा, माटो र टिनको छानाको दुईतले घरमा क्षति पुगेको प्रहरी नायब उपरीक्षक द्वारिकाप्रसाद घिमिरेले जानकारी दिए। उनका अनुसार घटनास्थलतर्फ प्रहरी टोली खटाइएको छ। क्षतिबारे यकिन विवरण आउन बाँकी छ।

भूकम्पका कारण जिल्लामा भएको क्षतिबारे विस्तृत विवरण प्राप्त भइसकेको छैन। सम्भावित उद्धार तथा राहतका लागि प्रहरीसहित सबै संयन्त्र तयारी अवस्थामा राखिएको प्रमुख जिल्ला अधिकारी अनोजकुमार घिमिरेले बताए।

सङ्खुवासभाको भोटखोला गाउँपालिका–१ किमाथाङ्कामा एउटा घर भत्किएको छ। भूकम्पबाट स्थानीय तेन्छेवी शेर्पाको घरमा क्षति पुगेको सङ्खुवासभाका प्रमुख जिल्ला अधिकारी विनोदकुमार खड्काले जानकारी दिए।

जस्तापाताले छाएको शेर्पाको दुई तले ढुङ्गाको घरमा चिरा परेको उनले बताए। शेर्पाको घरमा सात जनाको परिवार बस्दै आएको थियो । उनीहरु भने सकुशल रहेका छन्।

भूकम्पबाट जिल्लामा मानविय क्षति भने नभएको प्रजिअ खड्काले बताए। क्षतिको विवरण संकलन गर्न स्थानीय तहका कर्मचारी, नेपाल प्रहरी र सशस्त्र प्रहरी बल खटिएको छ।

बारा जिल्लामा भूकम्पको त्रासका कारण ११ जना विद्यार्थी बेहोस भएका छन्।

प्रहरीका अनुसार बाराको कलैया उपमहानगरपालिका वडा नम्बर १ देवकोटास्थित त्रिचन्द्र माविका कक्षा ७ र ८ मा पढ्ने ११ जना विद्यार्थी बेहोस भएका हुन्।

उपचारपछि उनीहरूको स्वास्थ्य अवस्था सामान्य भई डिस्चार्ज भइसकेको प्रहरीले जनाएको छ।

प्रहरीका अनुसार भूकम्पबाट सिन्धुपाल्चोकको भोटेकोसी गाउँपालिका ४ स्थित प्रहरी चौकी भवन र रामेछापमा एउटा गोठमा क्षति पुगेको छ।

ओखलढुंगा र सोलुखुम्बुमा मानिस नबस्ने केही घरमा पनि क्षति पुगेको प्रहरीको भनाइ छ।

त्यस्तै आज बिहान काठमाडौँमा पनि एक व्यक्तिले भूकम्पकै त्रासका कारण घरको क्षतिका हामफालेका छन्।

आज बिहान ६ बजेर ५० मिनेट जाँदा चीनको जिजाङ्ग प्रान्तको सिगात्सेस्थित दिङ्गी गाउँमा केन्द्रविन्दु भएर ७ म्याग्निच्युडको शक्तिशाली भूकम्प गएको थियो।

सो भूकम्पको धक्का नेपालका कोशी, मधेश र बागमती प्रदेशका जिल्लाहरुमा महसुस भएको थियो।