चितवन पुगेर प्रचण्डले भने, ‘संघीय लोकतान्त्रिक गणतन्त्र दुर्घटनामा पर्ने खतरा छ’

चितवन – नेकपा माओवादी केन्द्रका अध्यक्ष पुष्पकमल दाहाल प्रचण्डले सरकारका संघीय लोकतान्त्रिक गणतन्त्र दुर्घटनामा पर्ने खतरा रहेको बताएका छन्।

चितवनको माडीमा सोमेश्वर माध्यममिक विद्यालयको स्वर्ण महोत्सवलाई सम्बोधन गर्ने क्रममा उनले भने, ‘संघीय लोकतान्त्रिक गणतन्त्रमाथि नै दुर्घटना हुने हो कि भन्ने खतरा पैदा भएको छ, ‘संविधान, लोकतन्त्र, समावेशी र समानताका पक्षमा यसले खोस्न खोजियो भने देश राजनीतिक खतरामा जान सक्छ।’

दुर्घटनाबाट देशलाई बचाउन उनले जनप्रतिनिधि लगायत सम्पूर्ण जनतालाई आआफ्नो ठाउँबाट आवाज उठाउन अनुरोध पनि गरे। प्रचण्डले आफू नेतृत्वको सरकार हुँदा केही सकारात्मक पहल भएको भए पनि अहिले त्यसलाई भत्काउने काम भइरहेको बताए।

पहिलो र दोस्रो दल मिलेर बनेको सरकारलाई असंवैधानिक बनेका प्रचण्डले भने सरकार बनेयता गरेका कामहरू संविधान र लोकतन्त्रको मर्यादाविपरीत काम भएका दाबी गरे।

सरकारले पछिल्लो पटक ल्याएका पाँच वटा अध्यादेश लोकतन्त्रको मर्यादा र भावना विपरित भएको प्रचण्डको भनाइ थियो। ‘अध्यादेशको जो लाइन लगाउन खोजिएको छ । सदनलाई छलेर अध्यादेशमार्फत् शासन गर्न खोज्नु लोकतन्त्रको मर्यादा र भावना विपरित हो,’ प्रचण्डले भने ।

समितिमै विचाराधिन रहेको विधेयकलाई पनि वास्ता नगरि सरकारले अध्यादेश ल्याएको भन्दै प्रचण्डले त्यसप्रति आपत्ति पनि जनाए।