सभापति कपमा संकटाको विजयी सुरुआत [तस्बिरहरू]

काठमाडौँ- राजधानीमा बिहीवारदेखि सुरु सभापति कप पुरुष फुटबल प्रतियोगितामा सङ्कटा क्लबले विजयी सुरुआत गरेको छ।

त्रिपुरेश्वरस्थित दशरथ रङ्गशालामा सम्पन्न खेलमा सङ्कटा क्लबले चर्च ब्वाइज युनाइटेड क्लबलाई ३–० गोलअन्तरले पराजित गरेको हो।

सङ्कटाको जितमा अबेक रिर्चडले दुई गोल गरे भने चन्दन दासले एक गोल गरे।

खेलको २३औँ मिनेटमै रिचर्डले सङ्कटालाई सुरुआती अग्रता दिलाए।

त्यस्तै खेलको ७०औँ मिनेटमा श्रीजन क्षेत्रीले चर्च ब्वाइजका कप्तान अनन्त तामाङलाई बिट गर्दै दिएको बललाई रिचर्डले नै जाली चुमाउँदै टोलीको अग्रता दोब्बर बनाए।

खेलको ७३औँ मिनेटमा चन्दन दासले गोल गरे।

हारसँगै चर्च ब्वाइज प्रतियोगिताबाट बाहिरिएको छ। भोलि दिउँसो ३ बजे मछिन्द्र क्लब र विभागीय टोली एपिएफ क्लबबीच प्रतिस्पर्धा हुनेछ।

नकआउट चरणमा सञ्चालन भएको उक्त प्रतियोगितामा विभिन्न आठ टोलीको सहभागिता छ।

प्रतियोगिताको विजेता टोलीले रु २६ लाख तथा उपविजेता टोलीले रु १३ लाख प्राप्त गर्नेछ।