बंगलादेशमा फेरि भड्कियो हिंसा, मुजिबुर रहमानको घरमा तोडफोड

ढाका- बंगलादेशमा फेरि हिंसा भड्किएको छ। पूर्वप्रधानमन्त्री शेख हसिना देश छाडेर भागेपनि उनकै कारण बंगलादेश फेरि अशान्त भएको छ।

अवामी लिगको प्रस्तावित राष्ट्रव्यापी विरोध प्रदर्शनअघि बुधबार राती बंगलादेशका धेरै सहरमा फेरि हिंसा भड्किएको स्थानीय सञ्चारमाध्यमहरूमा उल्लेख छ।

प्रदर्शनकारीले शेख हसिनाका पिता तथा बंगलादेशका संस्थापक शेख मुजिबुर रहमान ’बंगबंधु’को ढाकास्थित धनमन्डी–३२ मा रहेको निवासमा तोडफोड तथा आगजनी गरेका छन्।

त्यस्तै खुलनामा शेख हसिनाका काकाका छोराहरु शेख सोहेल, शेख ज्वेलको घर बुलडोजरले भत्काइदिएका छन्।

सामाजिक सञ्जालमा ’बुलडोजर र्‍याली’ को घोषणा भएपछि हिंसा भएको थियो।

आक्रमण हुँदा सुरक्षाकर्मी पनि उपस्थित भएको तर भीड नियन्त्रणमा लिने प्रयास नगरेको आरोप छ।

बुधबार राति र बिहीबार बिहान देशभर प्रदर्शनकारीहरूले शेख हसिनाको पार्टी अवामी लिगका नेताहरूको घरमा तोडफोड गरेका जनाइएको छ।

भारतमा रहेकी शेख हसिनाको अनलाइन कार्यक्रम हुनुभन्दा ठीक अगाडि हिंसा सुरु भएको थियो। बंगलादेशको अग्रणी अखबार ’द डेली स्टार’मा सामाजिक सञ्जालमा भाइरल पोस्टहरू अनुसार शेख हसिनाको ’बंगलादेश विरोधी गतिविधि’ का कारण यो विरोध प्रदर्शन गरिएको उल्लेख गरेको छ।

शेख हसिनाका विरोधीहरूले उनी भारतमा बसेर बंगलादेश विरोधी गतिविधि गरिरहेको आरोप लगाएका छन्। प्रदर्शनकारीले शेख हसिनाको पार्टीको विद्यार्थी शाखा छात्र लिगले एक अनलाइन कार्यक्रम आयोजना गरेको थियो। कार्यक्रममा शेख हसिनाले फेसबुक मार्फत बोल्ने जनाइएको थियो। कार्यक्रमको समय राति ९ बजे तोकिएको थियो। लगत्तै प्रदर्शनकारीहरूले ’बुलडोजर प्रदर्शन’को आह्वान गरेका थिए।

प्रत्यक्षदर्शीका अनुसार उनीहरूले त्यहाँ स्थापित शेख मुजीबुरहमानको भित्ते चित्र बिगार । राती ९ः३० बजे भवनमा आगलागी सुरु भएको थियो।

यसपछि राति २ बजेतिर भवनको एक भाग भत्काइयो। एक प्रदर्शनकारीले उनीहरूले संग्रहालयमा परिणत भएको घरलाई ’फासीवाद’ को प्रतीक भएकोले जलाउन चाहेको बताएका छन्। यता बंगलादेशमा आफूविरुद्ध भइरहेको गतिविधिप्रति हसीनाले रोष प्रकट गरेकी छन्।

उनले आफ्नो सम्बोधनमा देशवासीहरुलाई अपिल गर्दै वर्तमान शासनविरुद्ध संगठित प्रतिरोध गर्न आह्वान गरेकी छन्।

‘उनीहरूले भवनलाई ध्वस्त गर्न सक्लान्, तर इतिहासलाई सक्दैनन्। तर उनले यो पनि याद राख्नु पर्छ कि इतिहासले आफ्नो बदला लिनेछ,’ युनुस सरकारलाई भारतबाटै हसिनाले चेतावनी दिएकी छन्।

गएको वर्ष सरकारी कोटामा आरक्षणको विषयमा भएको विद्यार्थी आन्दोलनले हिंस्रक रुप लिएपछि हसीना देश छाडेर अगस्ट ५ मा भारत आएकी थिइन्।