काठमाडौँमा एसईओ सम्मेलन सम्पन्न

काठमाडौँ- एसईओ एजेन्सी ओर्का सोसल्सले सर्च इन्जिन अप्टिमाइजेसन (एसईओ) सम्मेलन आयोजना गरेको छ। फागुन १६ गते काठमाडौँमा सम्मेलन आयोजना भएको हो।

एसईओलाई करियर र व्यावसायिक रूपमा परिचित गराउने उद्देश्यसहित सम्मेलन आयोजना गरिएको आयोजकको भनाइ छ। काठमाडौं उपत्यका ललितपुर जिल्ला पुलचोकस्थित स्क्वायर होटलमा बिहान ९ बजे सुरू भएको कार्यक्रम साँझ ५ बजेसम्म चलेको थियो।

सम्मेलनले विज्ञ, डिजिटल मार्केटर, फ्रिल्यान्सर र व्यवसाय सञ्चालकहरूलाई एकै स्थानमा ल्याउन सफल भएको ओर्का सोसल्सका संस्थापक रामबाबु थापाले बताए।

वर्डप्रेस कम्युनिटी नेपाल र अन्तर्राष्ट्रिय एसईओ विज्ञहरूको सहकार्यमा सञ्चालित सम्मेलनमा १०० भन्दा बढी एसईओ व्यवसायी, उद्यमी, विद्यार्थी र फ्रिल्यान्सरको सहभागिता रहेको थियो।

कार्यक्रममा ‘नेपालमा एसईओ सेवाको दायरा र आवश्यकता’ विषयमा प्यानल छलफल भएको थियो। साथै डिजिटल मार्केटिङ, पेड विज्ञापन, एआई अटोमेसन, फ्रिल्यान्सिङका विषयमा पनि छलफल भएको थियो।

सम्मेलनमा वक्ताको रूपमा ओर्का सोसल्सका संस्थापक रामबाबु थापा, हान्सिकार टेक्नोलोजीका संस्थापक आदित्य भट्ट, सिकुम्न नेपालका संस्थापक तथा डिजिटल मार्केटिङ प्रशिक्षक डिजिटल सौगात र सोसल एम्बियन्सका संस्थापक दिपेश सापकोटा रहेका थिए।

सम्मेलनपछि पनि ‘एसईओ अवेर नेपाल’ अभियानमार्फत वेबिनारहरू र परामर्श कार्यक्रमहरू जारी राख्ने थापाको भनाइ छ। यस्ता सम्मेलनले एसईओको जनचेतना फैलाउन र क्षमता अभिवृद्धि गर्न ठूलो भूमिका खेल्ने पनि थापाले जानकारी दिए। पछिल्लो समय नेपालमा पनि एसईओप्रति रुचि बढ्दै गएको छ।