कीर्गिस्तानलाई हराउँदै भारत महिला च्यालेन्ज कपको सेमीफाइनल नजिक

काठमाडौं – भारतले नेपालमा जारी काभा अन्तर्राष्ट्रिय महिला भलिबल च्यालेन्ज कपमा लगातार दोस्रो जित निकाल्दै सेमीफाइनल नजिक पुगेको छ। त्रिपरेश्वरस्थित राष्ट्रिय खेलकुद परिषद (राखेप) को कभर्डहलमा मंगलबार सम्पन्न खेलमा किर्गिस्तानलाई सोझो सेटमा हराउँदै भारतले सेमीफाइनल सम्भावना बलियो बनाएको हो।

प्रतियोगिताको उपाधि दावेदार रहेको भातरले ३–० को सेटमा जित निकालेको हो। पहिले सेटमा २५–१७ को जित निकालेको भातरले दोस्रो सेटमा २५–८ र तेस्रो सेटमा २५–५ को जित निकालेको हो।

यो जितसँगै समूह एमा रहेको भारतले ६ अंक बनाएको छ। अब उसले अर्को खेलमा घरेलु टिम नेपालको सामना गर्नेछ। यता कीर्गिस्थानले पहिलो दिनको खेलमा नेपालसँग सोझो सेटमा हार बेहोरेको थियो। आज पनि हार बेहोरेपछि कीर्गिस्थान सेमीफाइनलमा स्थान बनाउनबाट बञ्चित भएको छ।

उसले, अब बरियताका लागि प्रतिस्पर्धा गर्नेछ भने अन्तिम खेलमा बंगलादेशको सामना गर्नेछ।

घरेलु टिम नेपालले आजै हुने अर्को खेलमा बंगलादेशको सामना गर्नेछ। यस्तै मंगलबार नै श्रीलंका र काजकिस्तान तथा उज्वेकिस्तान र माल्दिभ्सबीच समेत प्रतिस्पर्धा हुनेछ। राउन्ड रोविन लिग पछि शीर्ष २ टोलीले सेमिफाइनलमा र पुछारमा रहेका दुई टोलीले वरीयताका लागि प्रतिस्पर्धा गर्नेछन्।

तर काभाले बनाएको तालिका अनुसार वरियताको खेलसमेत खेल्नुपर्ने छ। नेपालले लगातार जित निकालेमा फाइनलपुग्नेछ भने सेमीफाइनलमा हार बेहोरेमा पनि वरियताका लागि खेल खेल्नु पर्नेछ।