करेन्ट, भोला र जित खैनीको बिक्री-वितरणमा रोक

काठमाडौँ-  वाणिज्य, आपूर्ति तथा उपभोक्ता संरक्षण विभाग करेन्ट गुट्खा, भोला गुट्खा, भोला पावर खैनी र जीत खैनीको बिक्री वितरण रोक लगाएको छ। यी पदार्थ उत्पादक कम्पनीले उपभोक्ता संरक्षण ऐन, २०७५ उल्लङ्घन गरेको भन्दै विभागले देशभरको बिक्रीवितरणमा रोक लगाएको हो।

विभागले ललितपुरस्थित पशुपति इन्टरनेसनल बिजनेस प्रालिलाई ३ दिनभित्र कागजातसहित विभागमा उपस्थित हुन पनि निर्देशन दिएको छ। पशुपतिले करेन्ट गुट्खा, भोला गुट्खा, भोला पावर खैनी र जीत खैनीलाई बजारमा वितरण गर्दै आएकव छ।

यी पदार्थमा तौलमा कैफियतसमेत देखिएकाले देशैभर कारोबार रोक्का गर्न निर्देशन गरिएको विभागले जानकारी दिएको छ।

यसै गरी पशुपति ट्रेडिङ्ग कन्सर्न काठमाडौँलाई पनि कागजात सहित ३ दिनभित्र विभागमा उपस्थित हुन सूचना दिएको छ।

यसअघि आइतवार गरिएको अनुगमनका क्रममा काठ्माण्डौँ–२२ स्थित आनन्द ट्रेडर्सलाई २लाख रकम जरिमाना गरिएको छ। उक्त फर्मलाई उद्योगबाट उत्पादित वस्तुमा एमआरपीसहित लेबल लगाएर बिक्री गर्न निर्देशन दिइएको छ।

उता बूढानीललकण्ठस्थित ट्रियु फामेसिया र स्किन फार्मेशीलाई बजारमा बिक्री वितरण गर्न रोक्का गरेको छ।

आइतवार नै गरिएको अनुगमनमा मधुगंगा इन्टरप्राइजेज, मित्रलाल पौडेल र सजिलो रेन्टल प्रालिलाई कागजातसहित विभागमा उपस्थित हुन निर्देशन दिएको छ।

उद्योग, वाणिज्य तथा आपूर्ति मन्त्री दामोदर भण्डारीको निर्देशनमा विभागले उपभोक्ताको अधिकारको संरक्षणका लागि निरन्तर अनुगमन तथा कारबाहीलाई प्रभावकारी बनाइरहेको जनाएको छ।

सरकारले बजारमा बिक्री गरिने सबै सामग्रीहरूमा अधिक्तम खुद्रा बिक्री मूल्य(एमआरपी) अनिवार्य गरेको छ। एमआरपी बिनै सामग्री बेच्नेलाई कारवाही गर्न सुरु गरिएको हो।