शुक्रबार दुई पटक स्थगित प्रतिनिधिसभा बैठक आज बस्ने कार्यसूची

काठमाडौं– शुक्रबार सभामुख देवराज घिमिरेले दुई पटक समय तोकेर पनि बस्न नसकेको प्रतिनिधिसभा बैठक आज बस्ने कार्यसूची छ। शुक्रबार बेलुकी ६ बजेका लागि बोलाइएको प्रतिनिधिसभा बैठक बस्न नसकेपछि आज अपराह्न ४ बजे बस्ने भएको हो।

संघीय संसद्द्वारा जारी सूचनामा भनिएको छ, ‘(शुक्रबार साँझ) ६ बजे बस्ने गरी निर्धारण भएको प्रतिनिधिसभा बैठक विशेष कारण बस्न नसक्ने भएकाले प्रतिनिधिसभा नियमावली, २०७९ को नियम ६ को उपनियम (३) बमोजिम सम्माननीय सभामुखज्यूले सभाको बैठक मिति विसं २०८० जेठ १३ गते शनिबार दिनको ४ बजे बस्ने निर्धारण गर्नुभएको छ।’

आजको प्रतिनिधिसभा बैठकमा प्रधानमन्त्री पुष्पकमल दाहालले सांसदले उठाएको प्रश्नोत्तरको जवाफ दिनेछन्। प्रतिनिधिसभा बैठकमा सरकारको नीति तथा कार्यक्रममा छलफल भइरहेको छ। शुक्रबारको बैठकमा एमालेले अवरोध गरेपछि आजका लागि प्रधानमन्त्रीको सवालजवाफ कार्यक्रम सारिएको हो।

आजको बैठकमा अवरोध नभए सरकारको नीति तथा कार्यक्रम पारित हुनेछ। आजको बैठकमा प्रधानमन्त्री प्रचण्डले नीति कार्यक्रममाथि उठेका प्रश्नको जवाफ दिने कार्यसूची छ।