विद्या पक्षमा खुल्नेलाई अप्ठेरो पार्दै एमाले संस्थापन, ईश्वरको पद नै धरापमा!

काठमाडौँ- पूर्वराष्ट्रपति विद्या भण्डारीको पक्षमा खुलेका नेताहरूप्रति नेकपा एमाले संस्थापन पक्षले वक्रदृष्टि राख्न थालेको छ। विद्या भण्डारीको पक्षमा खुलेका एमाले वरिष्ठ उपाध्यक्ष ईश्वर पोखरेलको पद नै खारेज गर्ने दिशामा एमाले संस्थापन अघि बढेको हो।

बिहीवार एमालेले सचिवालय कमिटीको बैठक बोलाएको छ। बैठकमा पार्टीमा वरिष्ठ उपाध्यक्ष पद नरहने गरी विधान संशोधनको निर्णय गर्ने तयारी एमालेको छ। आगामी भदौमा हुने विधान महाधिवेशनमाको तयारी र त्यसमा पेस गर्ने प्रस्तावहरूका विषयमा छलफल गर्न एमालेले सचिवालय बैठक बोलाएको हो।

प्रधानमन्त्रीसमेत रहेका एमाले अध्यक्ष केपी शर्मा ओलीको चाहनामा वरिष्ठ उपाध्यक्ष पद नै नरहने निर्णय गर्न लागिएको एमालेका एक नेताको भनाइ छ। ती नेताका अनुसार एमाले सचिवालयले गरेको निर्णय विधान महाधिवेशनमा पेस गरिने र त्यहाँबाट पारित गराएर वरिष्ठ उपाध्यक्ष पद नै खारेज गर्ने योजना छ।

एमालेले भदौ २०, २१ र २२ गते ललितपुरको गोदावरीमा दोस्रो विधान महाधिवेशन गर्ने निर्णय गरेको छ। एमाले सचिवालयले त्यस्तो निर्णय गरी विधान महाधिवेशनबाट पारित गराए ईश्वर पोखरेलको पद खारेज हुनेछ। विधान महाधिवेशनसम्म पोखरेलको वरिष्ठ उपाध्यक्ष पद कायमै रहनेछ। महाधिवेशनपछि भने एमालेमा कोही पनि वरिष्ठ उपाध्यक्ष रहनेछैन।

एमालेमा पछिल्लो समय ७० वर्षे उमेर हद र अध्यक्षको २ वर्षे कार्यकालबारे विवाद चर्किँदै गएको छ। यो विषयमा पनि सचिवालयमा छलफल हुने बताइएको छ।

एमालेमा ओली पक्षका नेताहरूले विद्या पक्षमा खुल्ने नेताहरूलाई अप्ठेरो पार्ने कोसिस गरिरहेका छन्। एमालेको संगठन समन्वय विभाग संयोजकसमेत रहेका स्थायी कमिटी सदस्य भानुभक्त ढकालले असार २६ गते जनसंगठनका पदाधिकारीको भेलामा संस्थागत निर्णय नमान्नेहरू नोटिसमा रहेको भन्दै विद्या पक्षमा लाग्ने नेताहरूलाई चेतावनी दिएका थिए।

‘कसरी नेतृत्वलाई अप्ठ्यारो पार्न सकिन्छ भनेर बोल्ने नेताहरूबारे विचार गरिन्छ, नोटिस गरिएको छ,’ उनको भनाइ थियो। ढकालवाणी प्रस्फुटन भएपछि एमालेमा खैलाबैला सुरु भएको थियो।

‘पार्टीका नीति, विधिमाथि तलबितल गरियो भने मात्र नेता होइन्छ भन्ने सोचाइ त्याग्नुस्,’ ढकालको निर्देशन थियो, ‘पार्टीको संस्थागत निर्णय नमान्दा हुन्छ भन्ने मानसिकता केही संगठनका पदाधिकारीमा देखिन्छ। यस्तो प्रवृत्ति पार्टीको नोटिसमा छ।’

एमाले महासचिव शंकर पोखरेलले महाधिवेशनबाट पारित भएका विषयमा टिप्पणी गर्नु संगठनात्मक अराजकता हुने र त्यसलाई नमान्नेलाई ‘नोटिस’ गरिएको अभिव्यक्ति दिएका थिए। भेलामा पोखरेलले सङ्ठनात्मक अराजकताको प्रतिवाद गर्न निर्देशनसमेत दिएका थिए।

१० वर्षपछि एमालेमा फर्किएर नेतृत्व लिन खोजेकी पूर्वराष्ट्रपति विद्यादेवी भण्डारी पक्षमा खुल्ने नेताहरूको संख्या भने बढ्दो क्रममा छ। आफ्ना पति मदन भण्डारीको जन्मजयन्तीको अवसर पारेर मदन भण्डारी फाउन्डेसनको कार्यक्रम गरी असार १४ गते उनले एमाले राजनीतिमा फर्किएको उद्घोष गरेपछि उनको पक्षमा खुल्ने एमाले नेताहरूको लर्को लागेको छ।

तर एमाले महासचिव शंकर पोखरेल ओली कित्तामा अडिग छन्। उनले विद्या भण्डारी राजनीतिमा आउनु नै सकारात्मक नभएको भन्दै आएका छन्। ‘विद्या भण्डारी दुईदुईपटक राष्ट्रपति भएको मान्छे। भण्डारी एमाले राजनीतिमा फर्कँदा गणतन्त्रलाई नै कमजोर बनाउन सक्छ,’ पोखरेलले आफू निकटकाहरूसँग भन्ने गरेका छन्।