अफगानिस्तान भूकम्प : मृतकको संख्या ६ सय नाघ्यो, १५ बढी घाइते

एजेन्सी। पूर्वी अफगानिस्तानमा गएको ६।० म्याग्निच्युडको भूकम्पमा परी ६०० भन्दा बढीको मृत्यु भएको र १,५०० भन्दा बढी घाइते भएको बताइएको छ।

भूकम्पको केन्द्रबिन्दु अफगानिस्तानको पाँचौं ठूलो शहर जलालाबादबाट २७ किलोमिटर टाढा सतहभन्दा लगभग १० किलोमिटर तल रहेको थियो।मध्यरातमा गएको यस भूकम्पका कारण माटो र ढुङ्गाले बनेका घरहरू भत्किए। भूकम्पको धक्का पाकिस्तानको राजधानी इस्लामाबादसम्म महसुस गरिएको थियो, जुन लगभग ४०० किलोमिटर टाढा छ।

भूकम्पले दुर्गम पहाडी क्षेत्रहरूलाई असर गर्यो जहाँ मोबाइल सिग्नल कभरेज सीमित छ र पहिरोका कारण सडकहरू बन्द छन्।
घाइतेहरूलाई भग्नावशेषबाट उद्धार गरी हेलिकप्टरबाट सुरक्षित स्थानहरूमा लगिँदै छ र बाँचेकाहरूको खोजी जारी छ।

यो विपत्ति यस्तो समयमा आएको हो जब अफगानिस्तान पहिले नै मानवीय संकटको सामना गरिरहेको छ। एकातिर अन्तर्राष्ट्रिय सहायतामा ठूलो कटौती भएको छ भने अर्कोतर्फ छिमेकी देशहरूबाट ठूलो संख्यामा मानिसहरूलाई फिर्ता पठाइँदैछ।यसअघि अफगानिस्तानको राज्य प्रसारक ुरेडियो टेलिभिजन अफगानिस्तानु (आरटीए) ले मृत्यु हुनेको संख्या लगभग ५०० रहेको बताएको थियो।राजधानी काबुलका स्वास्थ्य अधिकारीहरूले उद्धार टोलीहरू दुर्गम गाउँहरूमा पुग्ने प्रयास गरिरहेको बताएका छन्।

यो क्षेत्र पहिले पनि धेरै पटक भूकम्प र बाढीबाट प्रभावित भइसकेको छ। ‘केही क्लिनिकहरूको तथ्याङ्कले मात्र ४०० भन्दा बढी घाइते र दर्जनौंको मृत्यु भएको देखाउँछ,’ स्वास्थ्य मन्त्रालयका प्रवक्ता शराफत जमानले रोयटर्सलाई भने। यो संख्या अझैँ बढ्न सक्ने उनले बताए।

रोयटर्स टेलिभिजन तस्बिरहरूले घाइतेहरूलाई बाहिर निकाल्दै हेलिकप्टरहरू र स्थानीयहरूले सैनिक र डाक्टरहरूलाई घाइतेहरूलाई एम्बुलेन्समा पुर्‍याउन मद्दत गरिरहेको देखाएको छ। रोयटर्सले स्वास्थ्य मन्त्रालयलाई उद्धृत गर्दै कुनार प्रान्तका तीन गाउँ पूर्ण रूपमा ध्वस्त भएको र अन्य धेरै गाउँहरूमा पनि ठूलो क्षति भएको बताएको छ।

कुनार प्रान्तका सूचना प्रमुख नजिबुल्लाह हनिफले रोयटर्सलाई बताएअनुसार प्रारम्भिक रिपोर्टहरूले मृतकको संख्या २५० र घाइतेको संख्या ५०० रहेको बताएको छ, तर त्यो संख्या परिवर्तन हुन सक्छ। अधिकारीहरूले प्रारम्भिक रिपोर्टहरूले एउटै गाउँमा ३० जनाको मृत्यु भएको र सयौं घाइतेहरूलाई अस्पताल लगिएको पुष्टि गरेको बताएका छन्।

राहतकर्मीहरूले पाकिस्तानको खैबर पख्तुनख्वासँग सिमानामा रहेका क्षेत्रहरूमा मानिसहरूको खोजी गरिरहेका छन्।