मन्त्री छान्ने प्रक्रियामा असन्तुष्टि जनाउँदै बालुवाटारमा सुदन गुरुङ समूहको नाराबाजी

काठमाडौँ: जेनजी प्रदर्शनको अगुवाका रूपमा देखिएका सुदन गुरुङको समूहले प्रधानमन्त्री निवास बालुवाटारअघि नाराबाजी गरेको छ। मन्त्री छनोट प्रक्रियामा असन्तुष्टि जनाउँदै उक्त समूह आइतबार मध्यराति बालुवाटार पुगेर नाराबाजी गरेको हो।

केपी शर्मा ‌ओली नेतृत्वको नेकपा एमाले-नेपाली कांग्रेस गठबन्धनको यसअघिको सरकारले फेसबुकसहित सामाजिक सञ्जालमा प्रतिबन्ध लगाएपछि जेनजीले सुरु गरेको ‘नेपो बेबी’अभियान सामाजिक सञ्जाल हुँदै सडकमा पुगेर आन्दोलनका रूपमा रूपान्तरित भएको थियो। भदौ २३ र २४ गतेको उक्त आन्दोलनले २७ घण्टामा सिंहदरबार, संसद् भवन, प्रधानमन्त्री र राष्ट्रपति निवाससहित देशभरका सार्वजनिकसहित निजी सम्पत्तिमा आगजनी र तोडफोड भएको थियो। अन्तत: ओली प्रधानमन्त्री पदबाट राजीनामा दिन बाध्य भई उनीसहित शीर्ष नेताहरू सेनाको सुरक्षामा भाग्नुपर्ने अवस्था सिर्जना भएको थियो।

सुदन गुरुङ नेतृत्वको ‘हामी नेपाल’ समूहका युवाहरूको प्रस्तावमा नेपाली सेनाको अग्रसरतामा राष्ट्रपति रामचन्द्र पौडेलबाट गत शुक्रबार कार्की अन्तरिम सरकारको प्रधानमन्त्री नियुक्त भएकी थिइन्। गुरुङले कार्की प्रधानमन्त्री नियुक्ति भएलगत्तै बालुवाटारमै उनको खुट्टा समेत ढोगेका थिए।

तर डिस्कोर्ड हुँदै सामाजिक सञ्जालबाट भएको आन्दोलनपछि युवाहरूले डिस्कोर्डबाटै भोटिङ गरी मन्त्री छान्ने बताइरहेको बेला कार्कीले धमाधम मन्त्रीको टुंगो लगाउन थालेपछि गुरुङसहितको समूहले आइतबार मध्यराति बालुवाटारमा प्रदर्शन गरेको हो। गुरुङ समूहसहित प्रदर्शनमा जेनजी शहीदका आफन्तको पनि उपस्थित रहेको थियो। उनीहरूले  ‘प्रधानमन्त्री राजीनामा दे’, ‘मुर्दामाथि राजनीति नगर’ लगायतका नारा लगाएका थिए।

प्रधानमन्त्री कार्कीले आइतबार तीन मन्त्रीको नाम टुंगो लगाएकी छन्। आज(सोमबार) उनीहरूले पद तथा गोपनीयताको शपथ लिँदैछन्। बालुवाटारनिकट स्रोतका अनुसार अर्थविद् रामेश्वर खनाल, नेपाल विद्युत प्राधिकरणका पूर्वकार्यकारी निर्देशक कुलमान घिसिङ र अधिवक्ता ओमप्रकाश अर्याल मन्त्री बन्ने टुंगो लागेको छ।