एनपिएल उद्घाटन खेलमा जनकपुरमाथि काठमाडौँको जित

काठमाडौं। नेपाल प्रिमियर लिग (एनपीएल) को उद्घाटन खेलमा साविक विजेता जनकपुर बोल्ट्सललाई हराउँदै काठमाडौँ गोर्खाजले प्रतियोगितामा सुखद् सुरुआत गरेको छ।

कीर्तिपुरस्थित त्रिवि अन्तरर्राष्ट्रिय क्रिकेट मैदानमा आज भएको खेलमा काठमाडौँले जनकपुरमाथि पाँच विकेटको जित निकालेको हो।

जितको लागि १३१ रनको लक्ष्य पछ्याएको काठमाडौँले १८ ओभरमा पाँच विकेट गुमाउँदै पूरा गर्यो।

काठमाडौंको जितमा बेन चाल्र्सवर्थले ४६ रन बनाए। उनले २३ बलमा पाँच चौका र तीन छक्काको सहयोगमा ४६ रन बनाए। यसैगरी आकाश त्रिपाठीले ३९ रन बनाए। मिलिन्द कुमारले १९ रन बनाए भने जोहन सिम्पसनले १३ रन जोडे।

बलिङतर्फ जनकपुरका किशोर महतो, अनिल साह, सञ्जय कृष्णमूर्ति र ललित राजवंशीले समान एक/एक विकेट लिए।

त्यसअघि टस हारेर पहिले ब्याटिङको निम्तो पाएको जनकपुरले निर्धारित २० ओभरमा छ विकेट गुमाएर १३० रनको योगफल बनाएको थियो।

जनकपुरका लागि आसिफ शेखले सर्वाधिक ५४ रनको योगदान दिए। उनले ४१ बलमा छ चौका र एक छक्का प्रहार गर्दै ५४ रन बनाएका हुन्। यस्तै, मयन यादवले ३४ तथा लाहिरु समारकूनले २२ रन बनाए। लाहिरु मिलन्था सात रनमा आउट भए।

काठमाडौं गोर्खाजका लागि मिलिन्द कुमारले तीन विकेट लिए भने सन्तोष यादव, साहब आलम तथा करण केसीले समान एक/एक विकेट लिए।

यसअघि भएको पहिलो संस्करणको खेलमा भने जनकपुरले काठमाडौँलाई पाँच विकेटले पराजित गरेको थियो।

आजदेखि सुरु भएको प्रतियोगिता यही मङ्सिर २७ गतेसम्म सञ्चालन हुनेछ। प्रतियोगिताको विजेताले टोलीले एक करोड १० लाख रुपैयाँ पाउने छ। दोस्रो हुनेले ५१ लाख र तेस्रो हुनेले १५ लाख रुपैयाँ पुरस्कार प्राप्त गर्नेछ।

मंगलबार पहिलो खेल चितवन राइनोज र कर्णाली याक्सबीच हुने । दोस्रो खेल विराटनगर किङ्स र पोखरा एभेन्जर्सबीच हुनेछ। पहिलो खेल बिहान ११ः४५ बजे हुनेछ भने दोस्रो खेल दिउँसो ४ः०० बजे हुनेछ।