ग्रामीण सडकमा महिन्द्रा बोलेरोको एकछत्र वर्चस्व, कसरी जमायो पकड?

काठमाडौँ:  नेपालमा सबैभन्दा बढी देखिने पिकअप हो–महिन्द्रा बोलेरो। विशेषगरी ग्रामीण क्षेत्रमा जोडिएका सडक सञ्जालमा यात्रु ओसारपसारसँगै ढुवानीमा बोलेरो पिकअप पहिलो नम्बरमा पर्छ। नेपाली बजारमा हुने बोलेरो पिकअपको बिक्रीले पनि यसलाई पुष्टि गर्छ।

नेपालका लागि महिन्द्राको आधिकारीक विक्रेता अग्नी ग्रुपअन्तर्गतको अग्नी इन्कर्पोरेटले महिन्द्राको बोलेरो प्रतिमहिना ३ सयवटा भन्दा बढी बेच्छ। कम्पनीले यस वर्ष मात्रै १ हजार ८०० बोलेरो पिकअप बेच्ने लक्ष्य राखेको छ। कम्पनीका अनुसार महिन्द्राका सम्पूर्ण गाडीहरूको कुल वार्षिक सेल्समा बोलेरो पिकअपको हिस्सा मात्रै ६० प्रतिशत रहेको छ।

‘अहिले नेपालको बजार अर्थतन्त्र राम्रो छैन। सबैतिर मन्दी छ। तथापि, पिकअप सेग्मेन्टमा बोलेरोको माग यस्तो स्थितिमा पनि निकै राम्रो हो,’ अग्नी इन्कर्पोरेटेड प्रालिका पिकअप सेग्मेन्टका प्रतिनिधि तथा नक्साल ब्राञ्चका म्यानेजर हरिचन्द्र श्रेष्ठले भने, ‘नेपाली बाटो र माटो सुहाउँदो भएकोले पनि बोलेरो पिकअपले बजारमा आफ्नो उपस्थितिलाई बलियो बनाएको हो।’

खासगरी गाडी चलाएर कमाइ गर्ने समूह नै बोलेरो पिकअपका प्रमुख ग्राहक हुन्। सामान ढुवानी, यात्रु ओसारपसार, हाइड्रो प्रोजेक्ट, कन्स्ट्रक्सन साइट, लजिस्टिक कम्पनीहरूबाट बोलेरो पिकअपको अत्यधिक माग छ। सुलभ मूल्य, उत्कृष्ट पर्फमेन्स र सर्भिस सेन्टरहरूको देशव्यापी नेटवर्कका कारण पनि ग्राहकहरूको रोजाइमा कम्पनीका अन्य गाडीहरूको सेग्मेन्टभन्दा महिन्द्राको पिकअप बढी परेको अग्नी इन्कर्पोरेटेडको दाबी छ।

महिन्द्राको पिकअप सेग्मेन्टमा कम्पनीले हाल सिंगल क्याबमा ३ वटा भेरियन्ट र डबल क्याब मोडलमा २ वटा भेरियन्ट बिक्री गरिरहेको छ। सिंगल क्याब भेरियन्टमा २४ लाख ३० हजारदेखि २७ लाख १५ हजार रुपैयाँसम्मको मूल्यमा पिकअप बिक्री भइरहेका छन्। त्यस्तै डबल क्याब भेरियन्टमा फोर व्हील र टु व्हील दुवै प्रकारका गाडीहरू नेपाली बजारमा उपलब्ध छन्। फोर व्हीललाई ३२ लाख ७५ हजार रुपैयाँ र टु व्हीललाई ३० लाख १५ हजारमा बिक्री भइरहेको अग्नी इन्कर्पोरेटेड प्रालिको सेल्स शाखाले जनाएको छ।

काठमाडौँमा मात्र ३ वटा शोरुममार्फत बोलेरो पिकअप बेचिरहेको कम्पनीले देशभर आफ्नै ११ वटा ब्राञ्चमार्फत यो गाडी बिक्री गर्दै आएको छ। त्यस्तै २० भन्दा बढी डिलरहरूले देशका विभिन्न शहरहरूमा गाडी बिक्री गरिरहेका छन्। बजारको हिसाबले बोलेरो पिकअपको सबैभन्दा बढी माग नेपालको पश्चिमी भेगमा छ। कुल पिकअप मागमध्ये करिब ५० प्रतिशत माग पश्चिमी भेगमा मात्रै छ। त्यस्तै बागमती प्रदेशमा यो पिकअपको माग ३० प्रतिशत रहेकोमा नेपालको पूर्वी भेगमा भने २० प्रतिशत मात्र रहेको छ।

१९९८ देखि नेपाली बजारमा देखिन थालेको बोलेरो पिकअप सबैभन्दा बढी भूकम्पपछिको पुनर्निर्माणको बेला बिक्री भएको कम्पनीको तथ्यांक छ। सन् २०१५ देखि १६ सम्ममा कम्पनीले महिन्द्राका विभिन्न ब्रान्डका कुल ७ हजार गाडी बेचेकोमा ४ हजार त बोलेरो पिकअप मात्रै बेचेको थियो। ‘तत्कालिन समयमा हाम्रा गाडीहरूको बिक्री ऐतिहासिक नै हो। बोलेरोले त झन् गज्जबको पर्फमेन्स गरेको थियो,’ नक्साल ब्राञ्चका म्यानेजर हरिचन्द्र श्रेष्ठले भने। श्रेष्ठले आफ्नो ब्राञ्चबाट मात्रै १ सय ३० करोडभन्दा बढीको ‘सेल्स टर्नओभर’ भएको सम्झन्छन्।

मर्मतका लागि सहज पार्टसको उपलब्धता र सर्भिस सेन्टरको देशव्यापी सञ्जाल हुँदा बोलेरो ग्राहकहरूको रोजाइमा बढी परिरहेको छ।

कम्पनीका अनुसार नेपालभर कम्पनीकै आधिकारीक ६५ बढी सर्भिस सेन्टरहरू छन्। त्यो बाहेक सामान्य ग्यारेजमा पनि बोलेरो पिकअपको मर्मत गर्न र पार्टस पाउन सकिने भएकाले सहजताको लागि पनि यो गाडीको माग छ।

बोलेरो पिकअपको बिक्री धेरै हुनुमा यसको रिसेल भ्यालु गज्जब हुनु पनि अर्को कारण रहेको कम्पनीको दाबी छ। १० वर्षसम्म प्रयोगमा आएर पुनः बेच्दा पनि बोलेरो गाडीले ५० प्रतिशत रिटर्न दिने गरेको कम्पनीले जनाएको छ। कम्पनीका अन्य सेग्मेन्टका गाडीभन्दा बोलेरो पिकअपको रिसेल भ्यालु गज्जबको रहेको कम्पनीले जनाएको छ।

पिकअप सेग्मेन्टमा अगाडि रहेको महिन्द्रा कम्पनीको नेपाल डिस्ट्रीब्यूटर अग्नी इन्कर्पोरेटेडले नेपालमा स्कोर्पियो जीप, थार जीप, एक्सयूभीका विभिन्न सिरिजहरू, ट्रयाक्टर, टेम्पो, बग्गीलगायतका गाडीहरू बेच्दै आएको छ।