ओस्कर विजेता संगीतकार रहमान भन्छन्: ८ वर्षयता बलिउडमा मलाई काम मिल्न कम हुँदै गएको छ

एजेन्सी: धेरै बलिउड फिल्महरूमा यादगार संगीत दिने ओस्कर विजेता संगीतकार एआर रहमानले स्वीकार गरेका छन् कि ‘बितेका आठ वर्षमा बलिउडमा उनलाई काम मिल्न कम हुँदै गएको छ।’ एक विशेष अन्तर्वार्तामा एआर रहमानले आफ्नो अहिलेसम्मको सांगीतिक यात्रा, बदलिँदो सिनेमा, आगामी योजना र समाजको वर्तमान वातावरणबारे खुलेर कुरा गरेका छन्।

नितेश तिवारीको आगामी फिल्म ‘रामायण’ मा उनले एल्बम कम्पोज गरेका छन्। फरक धर्मबाट आए तापनि यस फिल्मका लागि संगीत कम्पोज गर्दा उठेका प्रश्नहरूको पनि उनले जवाफ दिएका छन्। गत वर्ष ‘छावा’ फिल्म आएको थियो, जसमा एआर रहमानले संगीत दिएका थिए। यस फिल्मलाई धेरै इतिहासकारहरूले तथ्यहरूलाई बङ्ग्याएर प्रस्तुत गर्ने र विभाजनकारी बताएका थिए। फिल्म रिलिजको समयमा महाराष्ट्रका केही ठाउँमा हिंसासमेत भड्किएको थियो। एआर रहमानले पनि यस अन्तर्वार्तामा ‘छावा’ एक ‘बाँड्ने’ (विभाजनकारी) फिल्म भएको स्वीकार गरे।

यस अन्तर्वार्तामा रहमानले आफ्नो सुरुवाती संघर्ष, पश्चिमी र भारतीय संगीतबीच तालमेल मिलाउने चुनौतीहरूबारे पनि विस्तारमा कुराकानी गरेका छन्। फिल्म ‘एनिमल’ मा ‘रोजा’ फिल्मको एक साउन्ड ट्र्याक बज्छ, जसले नयाँ पुस्तालाई एआर रहमानको संगीतसँग परिचय गराउँछ। अब जब रहमान ‘एनिमल’ मा ‘छोटी सी आशा’ सुन्छन्, मानिसहरूले यसलाई इन्स्टाग्राम र टिकटकमा प्रयोग गरिरहेका छन् र यो जताततै ट्रेन्डिङमा छ। ३३ वर्षअघि बनाएको कुनै कुराले आज नयाँ जीवन पाइरहेको देख्दा उनलाई कस्तो लाग्छ?

यस प्रश्नमा रहमान भन्छन्, ‘यो नोस्टाल्जिक छ। उनीहरूले मलाई कहिल्यै सोधेनन् पनि। रिलिजपछि उनीहरूले भने कि हामी यसको प्रयोग गर्दैछौँ। ओरिजिनल रेकर्डिङ भए तापनि हामी यसको ‘एटमोस मिक्स’ गर्ने प्रयास गर्दैछौँ र यो अहिले पनि धेरै राम्रो सुनिन्छ।’

तर ३३ वर्षअघि यो साउन्डट्र्याक रिलिज भएको दिन उनलाई आज पनि याद छ। उनी भन्छन्, ‘रोजा’ गर्दा म धेरै निराश थिएँ। मेरो विचार थियो कि ठीक छ, यो गर्छु अनि त्यसपछि निस्किएर आफ्नै एल्बम बनाउँछु। मलाई फिल्ममा रहनु थिएन किनभने मेरो पूरा बाल्यकाल फिल्ममै बितेको थियो। भाग्यवश, सबै कुरा मैले चाहे जस्तै बदलियो। डल्बी आयो, त्यसपछि डीटीएस आयो र साउन्ड राम्रो भयो।’

‘म अलि निराशावादी थिएँ। तर पछि सबै बदलियो। प्रविधि धेरै छिटो आयो। पाँच वर्षमा डीटीएस डिजिटल र डल्बी आयो। यसले मलाई सफलता र अवार्डहरू पनि दिलायो, त्यसपछि मैले भनेँ- ठीक छ, छाड्नुअघि अझै केही गरौँ। र १० वर्षपछि मैले भनेँ- अब छाड्ने कुरा बन्द,’ उनले भने।

रोजाको संगीत बनाउँदाको सुरुवाती संघर्षबारे उनले भने, ‘जब मैले १६ ट्र्याकमा संगीत मिक्स गर्न सुरु गरेँ, तब बाँकी स्टुडियोमा मात्र ३ ट्र्याक थिए। मलाई लाग्यो यो संगीत टिकिरहनेछ र उस्तै सुनिनेछ। यसमा गिरावट आउने छैन। मलाई यसलाई डकुमेन्ट र स्टोर गर्नु थियो, आर्काइभ गर्नु थियो। मसँग टेपका लागि पैसा थिएन, त्यसैले मैले आफ्ना सबै ब्याकग्राउन्ड स्कोर र पुराना गीतहरू मेटाउनुपर्‍यो। मसँग गीतका टेपहरू छन् तर स्कोरहरू छैनन्। किनभने फिल्मका लागि मलाई धेरै कम पैसा मिल्थ्यो। जति एउटा जिङ्गलका लागि पाइन्थ्यो, त्यति मलाई ६ महिनाको फिल्मको काममा मिल्थ्यो। तर म बुझिसकेको थिएँ कि म विकसित भइरहेको छु।’