तीन महिनादेखि काठमाडौँमा लुटपाट गर्दै आएको गिरोहका १० जना पक्राउ

काठमाडौँ: प्रहरीले काठमाडौँका विभिन्न स्थानमा लुटपाटमा संलग्न गिरोहलाई पक्राउ गरेको छ। प्रहरीले बुधबार राति काठमाडौँको मूलपानीमा गोली चलाएर १० जना लुटेरालाई पक्राउ गरेको हो। उनीहरूलाई प्रहरी परिसर काठमाडौँले बिहीबार दिउँसो पत्रकार सम्मेलन गरी सार्वजनिक गरेको हो।

बुधबार मध्यराति मूलपानी चेकप्वाइन्टमा ड्युटीमा खटिएका प्रहरीलाई मोटरसाइकलले ठक्कर दिएर भाग्न खोजेपछि गोली चलेको थियो। गोली लागेर एक जना घाइते भएका छन्। त्यसक्रममा १० जना लुटेरालाई नियन्त्रणमा लगिएको हो।

विभिन्न पीडितले उजुरी गरेपछि प्रहरीले लुटेराविरुद्ध सर्च अपरेसन चलाएको थियो। लुटपाटका मुख्य योजनाकार २३ वर्षीय विनय तामाङसहित पक्राउ पर्नेहरूमा २३ वर्षीय आयन माझी, २३ वर्षीय मिनस रसाइली, ३२ वर्षीय समन माझी, २९ वर्षीय पेमा तामाङ, २० वर्षीय सलोन तामाङ, १८ वर्षीय राजीव भण्डारी, २२ वर्षीय विशाल तामाङ, २८ वर्षीय विदुर विश्वकर्मा र २९ वर्षीय फुवा तामाङ रहेका छन्।

प्रहरीले उनीहरूको साथबाट बागमती प्रदेश ०१००२ ज ०७६६ नम्बरको ट्याक्सी, बा १२ च ७७०१ नम्बरको निजी गाडी र ६ वटा मोटरसाइकल पनि बरामद गरेको छ। लुटेराले दिउँसोको समयमा निजी गाडीमा तथा ट्याक्सी चलाएर रेकी गर्ने र रातको समयमा लुटपाट गर्ने गरेको खुलेको प्रहरीले जनाएको छ।

उनीहरूले मोटरसाइकलमा २-३ जनाको समूह बनाएर रातको समयमा लुटपाट गर्ने गरेको खुलेको छ। लुटपाटका क्रममा पीडितलाई कुटपिटसमेत गर्ने गरेको जसकारण कतिपयलाई गम्भीर चोट लागेको छ भने गहना लुट्दा पीडितको कानै च्यात्तिएको अवस्थामा पनि रहेको प्रहरीले जनाएको छ।

लुटपाटमा अन्य व्यक्तिहरू पनि रहेकोमा उनीहरूको खोजी कार्य भैरहेको जानकारी प्रहरीले दिएको छ।