रवि लामिछानेको मुद्दा फिर्ता लिने निर्णयविरुद्धको रिट सोमबार पनि हेर्दाहेर्दै

काठमाडौँ: राष्ट्रिय स्वतन्त्र पार्टी (रास्वपा)का सभापति रवि लामिछानेविरुद्धका सम्पत्ति शुद्धीकरण र संगठित अपराध कसुरका मुद्दा फिर्ता लिने रिटविरुद्धको रिट आज पनि हेर्दाहेर्दैमा राखिएको छ।

आइतबारदेखि न्यायाधीशद्वय सुनिलकुमार पोखरेल र शारङ्गा सुवेदीको इजलासमा नियमित सुनुवाइ सुरु भएकोमा सुनुवाई नसकिएपछि सोमबार उक्त मुद्दा हेर्दाहेर्दैमा राखिएको हो।

अब मंगलबार उक्त रिटमाथि सुनुवाइ हुनेछ।

महान्यायाधिवक्ता सविता भण्डारीले पुस ३० गते लामिछानेलाई सहकारी ठगीमा मात्र मुद्दा चलाउने र अन्य दुई गम्भीर प्रकृतिका मुद्दा हटाउन जिल्ला सरकारी वकील कार्यालयहरूलाई निर्देशन दिएकी थिइन्। उक्त निर्णयविरुद्ध सर्वोच्चमा तीनवटा रिट परेका छन्।

उक्त मुद्दाको आइतबारदेखि नियमित सुनुवाई भए पनि रिट निवेदकका तर्फबाट वरिष्ठ अधिवक्ता सुरेन्द्र भण्डारीले न्यायाधीश पोखरेलले उक्त मुद्दा हेर्न नमिल्ने बताएका थिए। पोखरेल अधिवक्ता रहँदा लामिछानेका तर्फबाट दोहोरो नागरिकता र राहदानीको मुद्दामा बहस गरेकाले अहिले लामिछानेको मुद्दा हेर्न नमिल्ने तर्क भण्डारीको थियो। यद्यपि, न्यायाधीश पोखरेलले उक्त मुद्दा हेर्ने बताएपछि आइतबारदेखि न्यायाधीश पोखरेलसहितको इजलासमा सुनुवाइ जारी छ।

न्यायाधीश पोखरेलमाथि भने न्याय परिषद्‌मा सोमबार उजुरी परेको छ।